مش عارف أوصلك…
زي النازفة، شايفك من بعيد… قلبي بيقرب
، بس جسمي واقف.
معنديش جرأتها، ولا اندفاعها…
كل اللي عندي هو شوق، وكسرة، وصمت بيعييني.
النازفة دي ما استنتش حد ياخد بإيدها،
ما قالتش حد يفتح لها طريق،
هي بكل ضعفها، بكل تعبها،
زحفت وسط الزحمة ولمست هدب ثوبك…
وكان كفاية.
وأنا؟
أنا حتى مابقيتش قادر ألمس،
بس عايزك إنت تيجي،
تعالى المسني يا سيدي،
زي ما كنت بتعدّي وتوقف…
عدي عليا المرة دي، وخدني من وسط الزحمة،
أنا مش قادر أتحرك، بس قلبي بيناديك.
النازفة قالت “لو لمست”،
وأنا بقول “لو بس تبصّلي”،
لو تمدّ إيدك من بعيد،
كفاية عليا… إني أعرف إنك لمستني.