[walaa farouk]

هو ليه واحد بيحب ربنا، وبيخدم الناس،
ومشهود له بالفرح… ممكن يوصل للحظة انهيار قاتلة زي دي؟
إزاي الوجع الداخلي يوصل لدرجة إن الجسد نفسه مايتحملوش؟

اللي حصل ده بيواجهنا بحقيقة مرعبة:
إن مش كل اللي بيضحك مرتاح
، ومش كل اللي بيخدم ماشي على أرض ثابتة.
وإن الكاهن إنسان… والقداسة مش معناها انعدام الألم.

الكاهن ده سايب وراه ناس بتسأل: هو ماكنش يقدر يطلب مساعدة؟
سايب شباب بيحبوه حاسين بالخذلان، والتوهان.

اللي حصل ده بيواجهنا بـ 3 حقايق:

١. الاكتئاب مش ضعف إيمان، بل وجع محتاج احتواء

فيه ناس بتصلي وموجوعة.
فيه ناس بتخدم وهما بينهاروا جوه.
يسوع نفسه قال: «نفسي حزينة جدًا حتى الموت» (مرقس 14: 34).
يعني فيه وجع وحزن بيوصل لدرجة الموت، لكن برضه فيها رجاء في وسط العتمة.

٢. اللي بيضحك دايمًا قدامك مش بالضرورة يكون مش محتاج حضن

أكتر ناس بنعتبرهم “strong” هما في الحقيقة أكتر ناس لو وقعوا، محدش هايلمهم.
لأن الكل متعود ياخد منهم، وبينسوا أنهم بشر.

٣. محتاجين نعترف إن الصحة النفسية مش رفاهية

مش عيب إن كاهن ينهار.
العيب إننا نلَّبس كل حاجة لبس روحي ونقفل الباب على الجرح.
يسوع نفسه ماخفاش ضعفه: بكى، صرخ، طلب دعم.
ليه إحنا بنستخبى؟

لو أنت كاهن أو خادم أو شخص دايمًا بيدّي ومابياخدش:
لو سمحت… اطلب مساعدة. اتكلم.
حتى لو مافيش كلام، ابعت صوت،
ابعت دمعة، قول “أنا تعبان مش قادر”.
مفيش عيب في ده،
العيب إننا نكمل ساكتين لحد ما الجسد يستسلم
والقلب يموت ويفقد روحه.