[walaa farouk]

قصة حنانيا وسفيرة… كلنا عارفينها، وكل مرة بنسمعها بنقول:
"إزاي كده؟ مش قاسي العقاب ده؟!"
بس لو رجعت اصحاح واحد ورا، هتلاقي السر…

برنابا باع الحقل بتاعه، وجاب كل الثمن، وحطه عند أقدام الرسل.
حنانيا وسفيرة… عملوا زيه، تقريبًا نفس الخطوات.
بس كان فيه فرق صغير جدًا في الظاهر… وجوهري جدًا في قلبهم.

الكتاب قال: "اختلس من الثمن"
بس استنى! دي فلوسهم!
دي أرضهم!
هما اللي اشتغلوا فيها وباعوها…
ومع ذلك، اتقال عنهم إنهم "اختلسوا".

ليه؟
لأنهم ادّعوا إنهم بيقدموا الكل،
بس كانوا مخبيين حتة لأنفسهم.
مش في الفلوس… في النية، في الصدق مع الله.

وزيهم؟
إحنا…
بنرنم ونقول: "كلي لك"،
"الغالي يرخص ليك"،
"خذني لك تمامًا"…
بس لما يطلب مننا اللي على قلبنا… اللي تعبنا فيه…
بنرجع نختلس.

الخطر مش في القليل اللي قدمته،
الخطر في الكثير اللي خبيته وإدّعيت إنه مش موجود.

مشكلتهم ماكنتش في الرقم…
لكن في القلب اللي بيقدّم نصف الحقيقة،
ويدّي إحساس إنه كله على المذبح…
وهوّ في الحقيقة لسه ماسك في الحتة اللي مش عايز يسيبها.

النهارده…
ربنا مش بيدور على مبلغ…
بيدور على قلب صادق.
بيقول: "ابني… بنتي…
مش عايز تمثيل على المذبح… عايزك أنت."