[walaa farouk]

يارب ..
على قد كل يوم قلبي وجعني فيه
وأنا ساكت،
وأنا مش لاقي اللي يفهم،
وأنا بضحك قدام الناس
وأنام والدمعة بتسابقني.
على قد كل مرة قلت فيها “تمام”
وأنا من جوّا متكسّر ..
على قد كل صلاة قلتها وكنت باعيط
بس بصوت واطي علشان محدش يسمعني.
على قد كل لحظة قلت فيها:
“هو فين العوض؟”
وملقتش غير الصمت.
عوضني.
مش بالعادي،
مش باللي الناس تقول عليه حلو..
عوضني بطريقتك،
اللي فيها لمسة سما..
اللي فيها “أنا شايفك، سامعك، وحاسس بيك.”
عوضني براحة،
بفرح مش مربوط بسبب،
بسلام ياخد القلب ويطبطب عليه.
أنا مش طالب أكتر من حضنك،
بس لو هييجي معاه عوض..
خليه على قد الوجع.
علشان قلبي محتاج يفرح،
ويصدق إن كل اللي راح..
مكانش ضايع،
كان مزروع لعوض إلهي.