[walaa farouk]

ايليا راح خبط على ارملة صرفه بابها ايام المجاعه والجفاف
وقالها انا عطشان هاتيلي اشرب
وهي رايحه تجيبله المايه قالها هاتيلي كسرة خبز معاكي اكلها

راحت وقفت وقالتله
، انا معنديش غير شوية دقيق قليلين جداً وشوية زيت قدهم
يادوب اعمل بيهم كعكه صغيره اكلها انا وابني انهارده ، ( ونموت )
قالتلهاله كده بالنص ( ونموت ) كناية عن ان معندهاش اكل لبكره

ايليا قالها اسمعي الكلام واعملي بيهم خبزه صغيره ليا اكلها
وبعد كده اعملي ليكي ولأبنك
طبعا وارد لو حد مكانها كان قاله ( بقولك يادوب تكفيني انا وابني )
يعني انت تاكل وانا وابني نقف نتفرج عليك لحد مانموت من الجوع !
لكن هي ماعملتش كده
سمعت كلامه ونفذت اللي قاله
لكن الغريبه ان ايليا اكل وهي وابنها اكلوا واتبقي كمان
وكل لما تاخد من الدقيق مايخلصش وكل لما تاخد من الزيت ماينقصش
مع انهم من البدايه مايكفوش اكل يوم واحد
لكن ربنا بارك ،
وكفوها هي وابنها ايام كتيرة لحد ما انتهى الجفاف

وهنا حط كلمة ( ربنا بارك ) في قوس كبير
انسى انك تشبع بدون بركة ربنا
انسى انك تفرح بدون بركة ربنا

مش مهم الكتير ـ المهم البركه
كتير بدون ( بركه ) فقر
وقليل ( ببركة ربنا ) شبع وغنى وفيض
ربنا يملي حياتكم بالبركه ، البركه وبس
.. واي حاجه تانيه مقدور عليها