[walaa farouk]

"أنا عمري ما هنسى الليلة دي...
كنا قاعدين نحرس الخرفان زي كل ليلة..

فجأة الدنيا كلها نورت، والملاك ظهر...
طبعاً خوفنا، ومين لو شاف كده مش هيخاف!!

بس اللي لفت نظري إن الملاك قال لنا علامة غريبة...
قال هنلاقوا الطفل مقمط.
أنا وزمايلي بصينا لبعض... إحنا عارفين التقميط كويس.
أصلنا كل يوم بنشوف الخرفان المولودة وبنختار منها اللي هيتقدم للهيكل.

عارفين لما بنلاقي خروف مولود جديد؟ لازم نقمطه كويس..
. نلفه بالقماش لفة معينة، نشد الرجلين والجسم كده...
ده علشان يطلع سليم، مافيش فيه أي عيب،
ماهو الخرفان اللي هتروح للهيكل لازم تكون كاملة، بلا عيب.

وفي لحظة فهمت...
الطفل ده مش أي طفل.
ومن الكلمة دي بالذات 'مقمط' حسيت إن ربنا بيكلمنا بلغتنا إحنا...
بيقول لنا إن ده الحمل الحقيقي، الكامل، اللي مفيهوش عيب.

لما وصلنا المذود... يا سلام!
شفت الطفل ملفوف باللفة دي اللي بنعرفها.
.. نفس اللفة اللي بنعملها للخرفان.
حسيت ساعتها إن كل حياتي في رعاية الخرفان
كانت بتجهزني للحظة دي... للحظة ما أشوف حمل الله الحقيقي.

دلوقتي كل ما بقمط خروف، بفتكر الليلة دي...
وبفتكر إزاي ربنا كلمنا إحنا الرعاة الغلابة بلغة فهمناها...
وإزاي الطفل ده اللي كان مقمط في المذود، بقى بعد كده الحمل اللي شال خطية العالم كله."
شَق_السما