[walaa farouk]

دخولك الملكوت متوقف على حياتك اليومية العادية your life style
مش اوقات النشوة الروحية
ولا اوقات الخوف من الابدية
زى بعد وفاة حد صغير نعرفه او حادثة صعبة مثلا

لان الاحداث دى سواء النشوة او الخوف وقتية
وغير دائمة وهى تصلح للتنشيط فقط
لكن حياتك اليومية العادية هى دى المهمة

لذلك عود نفسك على عادات روحية معتدلة
تكون جزء من نسيج حياتك اليومية العادية

عود نفسك على وقت خلوة روحية يومى جواه صلاة وانجيل
....عود نفسك على قداس اسبوعى مثلا بتصليه ايا كانت الظروف
....عود نفسك انك بتصوم اصوام الكنيسة
مش كل صوم هتفكر هتصوم ولا لا

وفى نفس الوقت متعودش نفسك على حاجة
تكون سبب فى حرمانك من السما

مثلا متعودش نفسك على جلسات النميمة والادانة والكلام
على الناس وانك تلاقى لذتك فى ده

فبلاش تتعود على عادة تسحبك غصب عنك لتحت

على رأى اللى قال ان اللى بتعمله النهاردة بمزاجك
بكرة هتعمله غصب عنك ودى حاجة مؤذية قوى انك تفعل مالا تريده

خلى برنامج يومك العادى يؤهلك لدخول السما لانك متعرفش امتى تؤخذ نفسك ....امساءا ام نصف الليل ام صياح الديك ام صباحا مر ١٣ : ٣٥

ده حتى بتوع الدايت يقولك ان الدايت الصح
اللى بيجيب نتايج صح هو ان الاكل الصحى يكون life style
مش فترة وتنتهى

كذلك اباءنا الروحيين علمونا انه يكون لينا قانون روحى (نظام)
نمشى عليه فى حياتنا الروحية فالمخ يتبرمج برمجة صح

لِذلِكَ أَنَا أَيْضًا [[أُدَرِّبُ نَفْسِي]] لِيَكُونَ لِي دَائِمًا ضَمِيرٌ بِلاَ عَثْرَةٍ مِنْ نَحْوِ اللهِ وَالنَّاسِ. (أع ٢٤ : ١٦)