[Mary Naeem]

كان في ارملة يونانية وعايشة في مصر ولها ابن شاب وحيد بيشتغل في لبنان..انقطعت اخباره فجأة، وبدأت امه تنشغل عليه، وبعدين جالها جواب منه بيقول انه هو جاتله امراض كتيرة جدا ومبيقدرش يتحرك من السرير ولا بيروح شغله واصدقائه زهقوا من خدمته وكانوا طبعا بيصرفوا عليه ويساعدوه في المصاريف وكدة، ومش لاقي حتي ثمن التذكرة ومش قادر كمان صحياً انه يرجع لوالدته مصر.. فوالدته لما عرفت قعدت تصلي ان ربنا يشفيه وتتشفع بصلوات الست العدرا..
فكانت كل يوم تروح العزباوية وتطلب من الست العدرا انها تشفيلها ابنها.. وبعدين جالها جواب منه تاني بيقولها: يا ماما وانا قاعد تعبان جداً ومش قادر اتحرك لقيت الباب بتاع الشقة بيخبط فقعدت اتعكز لغايت ما وصلت الباب لقيت وحدة جميلة جداً وبتقولي انت فلان؟ فقولتلها اه، فقالتلي: طيب خد الكوباية دي اشربها وانت هتبقي كويس خالص، فقال انا شربتها وشعرت بقوة ونشاط وشعرت كل الآلام اللي في جسمي اختفت.. فبسألها بقولها طيب مين حضرتك؟ قالتله انا مامتك كل يوم بتوصيني عليك وبتطلب مني اني اجيلك.. فقالها طيب اسمك اية؟ قالتله اسمي "العزباوية" وبصيت لقيتها اختفت ..
فكاتب في الجواب بيقولها بس يا ماما الاسم غريب، يعني اية العزباوية؟ وبعدين لقيت نفسي شفيت خالص واديني هروح اشوف عملي استلمه وابتدي اشتغل من اول وجديد.. فالست طبعاً فرحت وراحت ورت الجواب الاولاني اللي بيقول كان مريض ازاي وورت الجواب التاني لابونا هناك في العزباوية وسجلت المعجزة...
(من المعجزات اللي حكتها تماف ايريني عن الست العدرا..)
🙏 شفاعتهم وبركتهم تكون معانا امين 🙏
كله للخير