[walaa farouk]

لما ربنا يسيبك لعقلك
و يا ويلك من عقلك !!
عقلك ده لو مش مستنير ، يضيعكو يفلسك و يخرب بيتك (عفوا للكلمة) !!
علشان كده كل يوم و انت بتصلى، اطلب من ربنا يحميك من عقلك
، و من اندفاعك و من "غباء قراراتك" ..
و اكبر و أخطر عدو ليك هو انت نفسك، بعقلك ، بعندك، بطقة افكارك..
و العقل لما تسيبه يفكر من غير حكمة و لا بصيرة و لا خبرة ، يضيع و يضيع غيره ..
و يا ما ناس عملت قرارات مقتنعة انها غلط، و عندت .
. مش بس كده ، لكن كررت نفس الغلط بغباء تفوقت فيه على الغلط الأول
و هي شايفة طول الوقت انها صح !!
مثال :
واحد اتخانق مع مراته و اتعصب و غضب و ضرب و بهدل الدنيا و خرب حياته ،
و بدل ما يعترف بغلطته و يرد لها حقها و يطبطب عليها و يلم بيته المكسور ،
يكرر خناقاته و يلف فى قضايا و محاكم بحثا عن الانتقام و التشفى ..
كده الخراب يزيد ، و هو فى عقله شايف الغاط إللى عمله في الأول صح
، و الغلط إللى بعده صح الصح ، و اتاريه بيصلح الغلط بغلط أكبر منه !!
مثال تانى : واحد قرر يلف و يدور و يكذب، و اتفضحت الاعيبه، يكمل كذب و خداع
، و هو مقتنع ان الكذب التانى ح يصلح الكذب الاولانى ..
مثال تالت : واحد جرب يدير أعماله بالنصب، و فشل و اتفضح
، بعديها يكمل نصب على الناس ، مع أن النصب عمره ما يعالج النصب ..
و اللى مصمم على الغلط و عاند فيه ، ربنا يرفع من عليه ستره و بركته
، و تنطبق عليه كلمة الله "أَسْلَمَهُمُ اللهُ إِلَى ذِهْنٍ مَرْفُوضٍ (رومية ١: ٢٨)"