[Mary Naeem]

علشان مطبخك يبقي دايماً نظيف لازم يبقي عندك شوية أسلحة دايماً جاهزين




#نصائح_منزلية
1- كيس كلوركس الوان تحطيه فى بخاخه ومعاهم مايه وشوية خل ابيض
وده بقي بنلمع بيه الرخام والبوتاجاز والحوض و ممكن نلمع بيه العيال من كتر حلاوته 😂
تخلصى الأكل تجرى تنقلى الحلل من على البوتجاز ورشي رشة أو اتنين من المحلول ده وادعكى ولمعى بوتجازك وهو لسه سخن عشان الدهون ما تمسكش بس اوعى تتلسعى وتدعى عليه بس الستات الشاطره فهمانى وبتلمع البوتاجاز وترجع تحط الحله تانى وتكمل تسويه تانى 😂
خلصتى واتغديتى ما تخليش معلقه فى الحوض بعد الاكل فى ثوانى هتكونى مشطبة مواعينك وانتى بتحضري كوباية الشاى اللذيذة
خلصنا وشطبنا وده مستحيل عشان بيجوعو كل خمس دقايق 😂
️2- نلم فوط المطبخ ويجى دور السلاح التانى كيلو برسيل جيل سايب هنحطو فى ازايز وبضيف عليه قشر ليمون
و لو مش عندك حطى نص كيس الكلور الالوان معاه وننقع بقي فوط المطبخ لغاية بليل ونغسلها قبل ما نام ونسبها تنشف
3- عشان مطبخك يفضل نظيف ومرتب على طول
هقولك مثال لو خلصتي المواعين وهترصيها لازم تعدلي ترتيب الكوبايات وانتى بترصى الكوبيات النظيفه
هتفتحى درفة الحلل رتبي حللك قبل ما تدخلى الحلل النظيفه
علبة السكر خلصت اغسليها ونشفيها قبل ما ترجعى تمليها
علبة التوابل فاضية هنغسلها ونشفها كويس ونطحن التوابل وننزل فيها
طول ما ايدك فى المطبخ هيفضل زى الفل
كل اول شهر لما بجيب خزين الشهر
️بنضف كل برطمان قبل ما اضيف فيه الحاجات الجديده
4- كل شهر هاتى ليمونة واقطعيها من المنتصف وحطى معجون أسنان وحطيها فى حلة الغسالة وشغلى سخان الغسالة على ٤٠ واعملى دورة غسيل هتلاقى الغسالة نضيفة ومعقمه ومن غير اى روائح كريهه