[walaa farouk]

زوادة اليوم:
الثرثرة

حابب اليوم أنا وإنتو نتأمَّل بالوصيِّة الأولى من وصايا البابا فرنسيس : ما تثرثرو! لأنّو الثرثرة بحسب البابا فرنسيس هيّي من أكثر الهوايات يلّي منقوم بممارستها.

بس مرّات كتيرة ما منعرف إنها من الأعمال الأكثر شيطانيِّة يلّي بتتغلغل بالنفس وبتخرِّبها بلا ما نحسّ.

بيتابع البابا فرنسيس وبيقول :

«كلّ مَرَّة منِحكُم على إخوتنا بقلوبنا والأبشع من هيك منحكي عنُّن بالسوء قدّام الآخرين، منكون شوَّهنا صورة المسيح يلّي فينا وفِيُن».

الزوّادة بتقلّي وبتقلَّك :

على إيَّام المسيح كانو كل ما يجتمعو تنَين يكون هوّي التالت بيناتُن.

بإيّامنا اليوم ما لازم نسمح القول يصير : «كل ما إجتمعو تنَين يحكو على تالت مش بيناتُن»، والله معك.