عارف لما (سنسور العربيه ) بيقعد يديلك صوت
وانت بتركن علشان ماتخبطش
يجيلك واحد يقولك جمله عظيمه ( خش هاتجيبك)
فتسمع كلامه فالعربيه تديك صوت انك هاتخبط
وصوت الشخص ده يعلي ويقولك ( يا بيه خش هاتجيبك)
فتبقي في حيره اسمع كلام (السنسور ) اللي بيقولي خد بالك
ولا اسمع كلام شخص واقف من بره مش سامع السنسور وبيقولي ( خش هاتجيبك)
للأسف ساعات بنطنش صوت ( السنسور)
ونروح لصوت الناس اللي بتقول ( خش هاتجيبك)
وفجاءه تلاقي عربيتك اتخبطت
وتلاقي كمان الشخص اللي بره العربيه يقولك ايه
(يا بيه ارجع بس براحه) وتطلع انت غلطان
اهو ده اللي بنعمله مع ربنا
روح الله هو ( السنسور) عمال يعمل صوت ويقولي كفايا هاتخبط
قربت تخبط
بس في أصوات من بره عماله تقولي ( خش هاتجيبك)
خدها نصيحه اللي بيقولك (خش هاتجيبك ) لما تقع ( مش هايفيدك)
خليك في السنسور( الحساسات) اللي جوانا
اللي عماله تعمل صوت وتقولك هاتخبط
أبونا جوناثان رفعت