[walaa farouk]

بيقولوا: "خير وسيلة للدفاع الهجوم". 🏹
تلاقي مدرب كرة القدم، بيقول للاعيبة اتحركوا لقدام في الملعب،
علشان ننقل اللعب لنص ملعب الخصم، فنبعد الكورة
عن مرمانا ونقلل ضغط الهجمات علينا. 🥅⚽️

وفي الحياة الروحية كمان محتاجين نعمل كدا؛ محتاجين نخلي جهادنا الروحي إيجابي، يعني نجاهد في اقتناء الفضيلة،
مش بس نجاهد ضد الخطية.
فالفضيلة حصن بيقوينا ويخلينا نقدر بنعمة المسيح نقاوم الخطية.

طيب أبتدي بشكل عشوائي؟
لا .. خليك عارف إن أعظم فضيلة هي المحبة،
يعني زي ما بيقول الكتاب: «أَعْظَمَهُنَّ الْمَحَبَّةُ»
(1 كورنثوس 13: 13) وهي اللي بتتولد منها كل الفضايل
، فابدأ بيها، جاهد (حتى الدم) إنك تقتني المحبة
. القديس بولس الرسول بيقول: «وَأَمَّا غَايَةُ الْوَصِيَّةِ فَهِيَ الْمَحَبَّةُ مِنْ قَلْبٍ طَاهِرٍ، وَضَمِيرٍ صَالِحٍ، وَإِيمَانٍ بِلاَ رِيَاءٍ» (1 تيموثاوس 1: 5)
. يعني الهدف الأساسي من تعاليم ربنا ووصاياه هو الوصول للمحبة!

طيب أجاهد إزاي علشان أقتني المحبة؟
1- ابدأ بالصلاة السهمية المكثقة والموجهة والمحددة:
يعني الصلاة اللي متحددة الطلبة بتاعتها،
قول باستمرار بفكرك ولسانك وقلبك:
ياربي يسوع المسيح ابن الله الحي املاني بالمحبة،
ياربي يسوع المسيح ساعدني أحب بقلب شبه قلبك
، ياربي يسوع المسيح خليني أحب الكل
حتى اللي بيضايقوني أو بيكرهوني... إلخ.
الصلاة هي مفتاح كنز النعمة، مش هتقدر تتقدم خطوة
ولا تتخلص من خطية ولا تقتني فضيلة
إلا من خلال جهادك الأمين في مخدعك وصلاتك المستمرة.

2- المحبة محتاجة تدريبات كتيرة علشان تبقى واقعية وعملية،
جاهد على الأقل في 2 منهم، وهما: الغفران وتفضيل الآخر
. فجاهد إنك تغفر لاخواتك، راقب نفسك في كل موقف
علشان متكونش زعلان أو شايل منهم
، صلي من كل قلبك إن ربنا يديك القوة للمغفرة،
هتلاقي نفسك مش كاره حد ولا زعلان من حد
. كمان صلي إن ربنا يديك القوة إنك تفضل كل الناس على نفسك
، تبذل من أجل الكل، تبذل وقت أو صحة أو ماديا
. على قد ما تقدر. قول لربنا: ساعدني أحب الخير للكل،
وأفرح بنجاح غيري وبتميزه، وماغيرش من حد ولا أحسد حد على أي حاجة.

3- استمر .. استمر .. استمر! يعني متعملش كدا
لمدة يوم أو أسبوع أو شهر، وبعدين تنسى أو تكسل أو تزهق!
إنما جاهد حتى مطلع الفجر، يعني جاهد لحد ما نور النعمة
يبدد ظلام قلبك وينور روحك وكيانك وتقتني الفضيلة. وافتكر إن اللي بييجي سهل بيروح سهل. فاوعي تصدق الشيطان لما يقولك: "
خلاص انت اقتنيت المحبة، كفايا صلاة وتدريب لحد كدا"
. استمر سنوات في جهادك.