[walaa farouk]

ربنا
* شايف كل محاولاتِك الأمينة لإنجاح العلاقة
* مقدر كل دموع مسكوبة ف الخفا
عشان العلن يبقى كلة إبتسامة وبهجة ولعب وطاقة لأولادك
* حاسس بتقل حملِك على ضهرك وقلبك بدون شكوى أو تذمر
* عارف كويس صعوبة سكة الوعى والسعى
وقرع الأبواب عشان "المكن يجيب قماش"
* عادد كم المرات اللي ضحيتي ووطيتي
فيها لحد ما التيار العنيف يعدي بسلام
* سامع أنات قلبك وأسئلتك وحيرتك
اللي مش عارفه تنطقي بيها قصاد حد
* حتى لما ثورتي وقلبتي الترابيذة كان ف صفك
لأنه الوحيد اللي شاف كل القصة بكل زاوية مخفية فيها

ماتخافيش، هو شايف، مقدر، حاسس،
عارف، عادد، سامع و"ف صفك"...

ف صفك:
* مش منحاز ولا بيميز طرف على طرف
* عادل مش بتحكمة عادات وتقاليد مريضة ظالمة
* مصدقك ومش محتاج شهود يدعموا موقفك
ومصدق فيكي قلبك، قصدك، دوافعك، صراعاتك وأدائك
* بياخد موقف مش سلبي عاجز زى البشر
اللي لجأتيلهم ومصمصوا الشفايف وحطوا ايديهم على خدهم
* أصيل مش هايبيعك ولا هايسيب قضيتك
ويمشي ويديكي ضهرة مع اللي مشيوا
* ذراعة قديرة وعندة ف الموت مخارج "لنفسك"
قبل ما يكون للوضع اللي انتي فية
* هو أب ينفع تتسندي علية وتلجأي لية
وترمي كل أحمالك علية وهو وعد "أنا أريحكم"
*هو كمان أم تسمع وتحضن وتحتوي وتدافع عنك
وتصون سرك وماتهداش إلا لما ترجعلك حقك ونورك وضحكتك لوشك......