[Mary Naeem]

لما كملت خيمة الاجتماع، ولما تم تدشين الهيكل، كان حضور الله ومجده واضحين جدًا والكنيسة تأسست بسكنى الروح القدس وبقي المؤمنين هيكل الله «أَمَا تَعْلَمُونَ أَنَّكُمْ هَيْكَلُ اللهِ، وَرُوحُ اللهِ يَسْكُنُ فِيكُمْ؟» (١كورنثوس٣: ١٦).

فيه درس أساسي نتعلمه من خيمة الاجتماع، إنه مكانش مسموح لإنسان يعمل حاجه في بيت الله من استحسانه الشخصي. موسى أخد التعليمات بالتفاصيل الدقيقة من الرب ونفذها زي ما الرب رسمها بالظبط. والرب إدى حكمة خاصة للقائمين على العمل عشان يتمموا الموضوع «كَمَا أُوحِيَ إِلَى مُوسَى... حَسَبَ الْمِثَالِ الَّذِي أُظْهِرَ لَكَ فِي الْجَبَلِ» (عبرانيين٨: ٥)، أو زي ما بيقول سفر الخروج في إتمام عمل الخيمة “كما أمر الرب موسى” وتتكرر العبارة حوالي ١٥مرة في خروج٣٩؛ ٤٠! ولما أعطى داود سليمان والشعب تعليمات الهيكل قال «قَدْ أَفْهَمَنِي الرَّبُّ كُلَّ ذلِكَ بِالْكِتَابَةِ بِيَدِهِ عَلَيَّ، أَيْ كُلَّ أَشْغَالِ الْمِثَالِ».(١أخبار٢٨: ١٩).

يعني كل شيء مُرَّتب في بيت الله من الرب نفسه ولأن ده بيته فمش من حق أي إنسان إنه يغير ترتيب هو حاطه. الترتيب بالنسبة لنا النهارده تعليمه ومبادئه وأمثلته موجودة في الكتاب، عايزين نعرف إزاي تكون العبادة والخدمة، دور الرجل ودور المرأة، إيه هو التأديب الكنسي وإيه أهميته، إيه دور الكنيسة في العالم، كل الحاجات دي وأكتر محتاجين نتعلمها من الكتاب. وهنا أنا بشجعك صديقي إنك تتعلم من الكتاب وتعيش وسط بيت الله وتكون فاعل في البناء العظيم ده ولما تعيش هتفهم أكتر!