[walaa farouk]

ايوة حياتنا كانت أسهل قبل الانترنت
بس كان في محدودية كبيرة في وسائل التعلم

🛑كان رتم الحياة أهدى من دلوقتي
⛔️بس الهدوء خلى أهالي كتير تستسلم للروتين
ومتعملش حساب للزمن وتأمن عيالها صح

🛑كان التليفزيون فيه قناتين او ٣
⛔️ وده خلى عقول شباب كتير غير ناقدة
سهل السيطرة عليها وتشريبها معتقدات كتير من وجهة نظر واحدة

🛑كانت الأجازات ابسط واسهل ومفيهاش رفاهية ولا فشخرة
⛔️ودة كان بيشيل عبء كبير من على الأهل وبيخلي الناس تتبسط آه لكن أكيد برضه كان بيحصل مشاكل تحويش الفلوس ووضعه في الأولويات وخناقات على تفاصيل المتعة عادي

🛑 كانت البيوت مقفولة والطلاق مرفوض تماماً عند عائلات كتير
⛔️ لكن دة خلق جيل كبير من البيوت المقفولة على الخناقات والخلافات وعدم السوية النفسية من الأجيال اللي بعدها
بسبب نماذج عنف وأذى وبدون وعي اتورثت النماذج دي عبر الأجيال

🛑كان الطب والهندسة والشهادات دي اسمها العليا
والناس كلها بتروح وراها
⛔️ لكن المجتمع كان فيه أحكام على اي حد عنده حلم
او اي حد عنده هواية او موهبة ونفسه يحقق أي حلم
كان بيتبصله انه مش صح

🛑 كان الدنيا نضيفة وهادية والمواصلات سهلة والناس راقية
⛔️ ودة كان بيخلي الذوق العام أجمل وأرقى لكن لا ننكر ان كان في كل المجالات والشخصيات بس كان كل واحد في بيته 😁
محدش عارف عنه حاجة مش بيأثر في اللي حواليه في كل البيوت 🫣

الخلاصة
مفيش زمن سهل وزمن صعب
مفيش زمن كامل وكله راحة
سُنّة الحياة عدم الكمال وعدم الراحة
المهم ازاي نعرف نستفيد من الواقع
ونتعلم منه وازاي نتكيف على اوضاع معينه تُكسِبنا مهارات كتير