[walaa farouk]

" متسرقوش طاقة الناس وتمشوا"
دخلت محل ملابس علشان اشتري طقم ، عجبني طقم سألت عن سعره لقيته كويس ،
قيسته و طلبت من البياع "السيلز" يجيبلي مقاس أصغر و عجبني
و قلت له حطهم في شنطة ، لقيته بيقولي يا سلام لو كل الزباين تبقي زيك
.. قلت له ليه بس .. ربنا يكرمك بناس كويسين و احسن مني ..
وحبيت أنكشه و قلت له "بس انت شكلك معبي 😅 ..
قال لي يا باشا الواحد يدخل يفضل يتعبني و يطلب يقيس المحل كله
و في الاخر يقولي شكرا و يمشي .. او بعد ما ابذل معاه مجهود
و وقت يقولي في الاخر السعر مش مناسب ..
و لما أجي اعترض يقولي ده شغلك 🤬 .
قلت له انا مقدر اللي بتقوله بس صدقني ده في كل المجالات الناس مبترحمش
و مبتحطش نفسها مكان غيرها .. ناس كتير لما تيجي تحجز فندق
او تشتري جهاز او تتعامل مع عامل النظافة او تكون محتاجة خدمة معينة بفلوس ،
تفضل تستنزف اللي قدامها و تجيب أخره و ممكن في الاخر ميشتريش
او ميديهوش المقابل الكويس ، و حتي لو اشتري
ميصحش عشان اللي قدامه هياخد فلوس يتعبه و يطلع عينه بالشكل ده .
و أنا مروح في الطريق كنت بفكر في المشكلة دي ..
ولقيت انها مش بتحصل في التعاملات التجارية فقط .. دي كمان في العلاقات الانسانية
تلاقي ناس تقصدك في خدمة و تتعبك جدا و في الاخر متقدرش تعبك
و تقولك السلام عليكم و تمشي .. او ناس معتقدين دايما انك مستفيد من معرفتهم
فنظير ده هيتعبوك و ياخدوا كتير من وقتك ومن جهدك و هيعتبروا ده من حقهم .
• طاقة الانسان مش لعبة .
• طاقة الانسان غالية اوي بلاش تسرقوها وتمشوا .
• بلاش تسخروا الناس لخدمتكم بحجة ان دي شغلانتهم يخدمونا ،
بلاش تتعبوا الناس و تتطالبوهم بالمزيد بإعتبار ان ده حق مكتسب .
• حط نفسك مكان الانسان اللي قدامك و اعتبر ده انت ..
و شوف هتعامل نفسك إزاي ، و إيه اللي تتمني يحصل معاك .
• مفيش حاجة إسمها دي شغلانته .. شغلانته أه بس حسب تقديرك له
ربنا هيحط ناس تقدرك كدة .. وحسب استنزافك له هتلاقي مع الوقت ناس بتستنزفك
في شغلك وعلاقاتك بنفس الشعور اللي خليته يحسه .. لان بالكيل الذي تكيل به يكال لك و يزداد .
الراحة اللي هتسيبها في قلب الناس راجعالك في قلبك
و الطاقة اللي هتستنزفها من الناس هتتسرق منك .
فَكُلُّ مَا تُرِيدُونَ أَنْ يَفْعَلَ النَّاسُ بِكُمُ افْعَلُوا هكَذَا أَنْتُمْ أَيْضًا بِهِمْ (من كلمات السيد المسيح .. متي ٧)