[walaa farouk]

العصبية الزايدة أوي على أتفه الأسباب..
العياط بحُرقة من غير سبب أو على موقف بسيط جداً مش مستاهل..
إحساسك بإن الإبتسامة تقيلة عليك وفعلاً مش قادر تعملها..
التلكيك اللي بتعمله عشان تسيب اللي انت معاهم وبخناقة بسيطة
تدخل أوضتك وتقفل عليك وتقعد لوحدك..
السكوت اللي انت غرقان فيه ومش عارف حتى توصف "مالك"..
تعاملك الوحش الجاف مع كل الناس حتى الناس اللي فعلاًً كويسة معاك..
لو حسيت بكل دا فا هتلاقي ان اللي حواليك بيقنعوك ان ده "إكتئاب" ولازم تلحق نفسك..
بس موضوع الاكتئاب دا مش حالتك فا هتفضل تحلف لهم مليون يمين انك مش مضايق
.. هيقولولك "لا ما الشخص المكتئب بيرفض يشوف الحقيقة ومبيحسش انه مكتئب!"
هتتعصب وترفض وتزعق وتصرخ وتستسلم لفكرة "أنا فعلاً مكتئب"!
بس الحقيقة انك مش مكتئب.. كل الحكاية انك انت شيلت فوق طاقتك..
انت استحملت اوي..
انت ضحكت كتير وقت ما كنت عايز تبكي..
انت قولت انك تمام وكويس وقت ما كنت متدغدغ من جواك..
الحقيقة انك عمَّال تيجي على نفسك وإستحملت وعديت كتير أوي لناس ومقدروش..
الحقيقة انك منعت دموعك كتير تنزل علي اسباب تستاهل فا نزلت في اسباب متستاهلش..
منعت نفسك تتعصب في مواقف كتير تستاهل فا بقيت تتعصب في مواقف متستاهلش..
استحملت ناس متستاهلش فا بقيت مش قادر حتى تبص في وش حد يستاهل ..
اللي بتعيط من غير سبب ومتعصبة علطول وبتزعق ليل نهار دي مش مجنونة ولا مكتئبة
.. لأ دي استحملت كتير وشالت مسؤوليات كتير وضحكت كتير وهي موجوعة..
اللي بتعيط من غير سبب مش نكدية كل الحكاية ان جواها كتير
ومحدش فكر يسمعها او حتى يشيل عنها او معاها.