[walaa farouk]

"أعتقد كده متعادلين؟
نفس المشاعر بعيشها معاك
أنت خُذلت من ناس حبايبك و أنا كمان
أنت اتغدر بيك من ناس كنت مديهم الأمان، و أنا كمان
أنت كنت لوحدك بتصلي و بتعيط و أنا كمان
الكل كان ضدك و ماحدش كان واقف جنبك، و أنا كمان
اتشافت وحش و غلطان و مُذنب و أنا كمان
اتهانت و كرامتك اتهانت و نفسك اتذلت، و أنا كمان
أنا عيشت معاك كُل ده و في نفس ذكرى الأيام
اللي أنت جربت فيها بسـ..."

"كملي، سكتي ليه؟"

"احنا عُمرنا ما هنبقى متعادلين
أنت جربت كُل ده و أنت عُمرك ما غلطت، و لا اذنبت، و لا أخطيت
لكن أنا!
أنا اخطيت و أذنبت و جايز يكون كُل اللي جربته و عيشته من ألم نفسي و وحده و إهانة يكون عقاب على أخطائي و أفعالي
مش يمكن هي دي عدالة السماء!
اللي بيغلط بيتعاقب، جايز يكون كُل الألم النفسي
و وجع القلب ده عقاب ليا!"

"و جايز مايكُنش عقاب!"

"أنا مش هقولك اللي بيحصل ده، حصل ليه
و لا هقولك إني ماغلطتش و ماستحقش
لأ، أنا بعترف أمامك
أنا غلطت
و أخطيت
و استاهل
بس أنا بلتمس منك المغفرة!
قلبي وجعني، سامحني!"

"أنا طول الوقت بسامح."

"ماعنديش غير طلب واحد، و يمكن طلب من إنسان طماع أناني
زي ما جربت معاك مشاعر الحُزن، أجرب معاك مشاعر الفرحة!
أيام الكرامة و التعويض!
بعد ما تمت اهانتك و إذلاك و كسرة نفسك أمام الكُل
تمت قيامك و نُصرتك و غلبتك للموت
انتصرت على سُلطان الموت !
مش طالبة إني أنتصر على شيء قوي
أنا بس عايزة أجرب مشاعر بسيطة، بس مُهمة
و تلزم قلبي إنه يجربها جدًا
مشاعر الأمان لأشخاص يكونوا أهل للثقة
مشاعر حُب تملاني و تنسي قلبي أي وجع
عايزة أحس إن كرامتي رجعتلي و إن قلبي بيتصالح!
أعتقد دي حاجة بسيطة و قليلة قُصاد أفراح القيامة!
أسمح ليا و أعطي مكان لقلبي يجرب شكل الفرح الحقيقي
اللي منك عامل إزاي!"

"ليكن لك فرح دائم."