[Mary Naeem]

بنتى اربع شهور امبارح كانت درجة حرارتها عاليه جداً ومكناش عارفين نعمل ايه انا ومامتها ، لا كمدات نافعه ولا علاج خافض حراره نافع ، وللأسف القبض ماكنش لسه نزل ، وفى البيت كله ماكنش فيه غير ١٠٠ جنيه مقطعه..
كلمت دكتور صحبى استشيره اعمل ايه لان طبعاً ال١٠٠ مش هاتكفى كشف وعلاج ..
وصفلى علاج معين ..
روحت اجيبه من الصيدليه وانا طول الطريق بدعى واصلى ان الراجل يوافق ياخد ال١٠٠ المقطوعه ..
من شدة الصلاه اللى كنت بصليها وانا بجرى فى الشارع واحد فضل يبصلى جامد افتكرنى مجنون ..
دخلت الصيدليه وللاسف اللى كنت خايف منه حصل الراجل رفض ال١٠٠ جنيه..
طلعت بره وانا حرفياً هاتجنن مش عارف اعمل ايه ؟؟؟
والبت اللى هاتموت دى اعملها ايه ، لو اطول ابيع حته من جسمى عشانها مش هاتاخر لحظه طيب اعمل ايه ، اروح فين واجى منين ، دموعى كانت نازله زى السيل مش قادر مخى هايتشل اعمل ايه عشان اجيب فلوس العلاج ..
وانا ببكى لاقيت تليفونى رن ، مراتى بتكلمنى وبتصرخ قالتلى البنت مابتنطقش ..
جريت على البيت وخدت البنت على كتفى وطلعت على المستشفى ..
على باب المستشفى صرخت وقولت ياااااارب اتصرف ..
وهنا حسيت برعشه غريبه جوايا ..
دخلت الطوارىء خدوها منى وقالولى البنت دخلت غيبوبه بسبب السخونه الشديده ولازم تدخل العنايه ، الممرضه قالتلى روحت سيب مبلغ الاول على الريسيبشن .
روحت الريسيبشم قلعتله الدبله الدهب بتعتى وقولتله خدها بس عالجو بتى انا ماحلتيش غيرها ..
بتاع الريسيبشن رفض، فضلت ابكيله كنت هابوس ايديه راح سحب ايديه بسرعه قالى ماينفعش كدا انا موظف ماقدرش اتصرف كدا ، قولتله الله يخليك الدنيا ليل ومافيش حد ينجدنى..
بصرخ وببكى انت متخيل راجل بيشحت عشان علاج بته ..
فى لحظتها لاقيت صوت بيقول سيبه انا ضامنه ..
اديله الدبله بتعته والحساب عندى..
ببص كدا لاقيت مدير المستشفى كان واحد عملتله شغل نجاره فى بيته قبل كدا لانى جنب شغلى بشتغل نجار ..
وفضل يطمنى ان البنت هاتبقى بخير وهات الفلوس على مهلك ..
البنت الحمدلله انهرده الصبح فاقت والحراره نزلت ..
ربنا ممكن يصبر لكن مستحيل يتخلى عننا 😍