[walaa farouk]

يعني هي جات عليّ 😅
يمكن في وقت من الأوقات بنقول كده لنفسنا
بنحس إن إحنا اللي ماشيين غلط رغم إننا متأكدين إن مش ده الصح اللي بيتعمل..

لما تلاقي كل اللي حواليك ماشيين غلط يا ترى بتعمل ايه؟
هل بتمشي زيهم على حسب مبدأ ما هم كلهم بيعملوا كده
يعني هي جات عليّ

مثلًا..
ما هو كل الناس بتمشي حالها وبتدفع علشان تمشي دنيتها
ما هو كل الناس بتلف وتدور بس قصدهم فهلوة علشان يكسبوا أكتر..
ما كل الناس بتكذب علشان تخرج من موقف صعب فماجاتش من مرة..

تعرف "نوح"؟
اللي كان عايش في وقت صعب ووسط شعب أصعب
لدرجة أن الله قال عنهم:
وَرَأَى اللهُ الأَرْضَ فَإِذَا هِيَ قَدْ فَسَدَتْ، إِذْ كَانَ كُلُّ بَشَرٍ
قَدْ أَفْسَدَ طَرِيقَهُ عَلَى الأَرْضِ. فَقَالَ اللهُ لِنُوحٍ:
«نِهَايَةُ كُلِّ بَشَرٍ قَدْ أَتَتْ أَمَامِي،
لأَنَّ الأَرْضَ امْتَلأَتْ ظُلْمًا مِنْهُمْ. فَهَا أَنَا مُهْلِكُهُمْ مَعَ الأَرْضِ.
(التكوين ٦: ١٢، ١٣)
ناس مليانيين فساد لدرجة أن الأرض اتملت ظلم منهم
والله قرر أنه هيهلكهم..

لكن رغم كل ده كان قرار نوح إنه يعيش معاهم بالإستقامة
رغم التحديات علشان كده اتكتب عنه
وَأَمَّا نُوحٌ فَوَجَدَ نِعْمَةً فِي عَيْنَيِ الرَّبِّ .....
كَانَ نُوحٌ رَجُلاً بَارًّا كَامِلاً فِي أَجْيَالِهِ. وَسَارَ نُوحٌ مَعَ اللهِ. (التكوين ٦: ٨، ٩)
احتمال يكون الكلام ده عمليًا دلوقتي صعب
لكن ينفع نعيش حياة الإستقامة
اشجعك وأقولك إن فيه ناس كتير تانية
حتى بعد نوح عاشوا الحياة دي
وممكن أنت تكون واحد منهم
اطلب منه دلوقتي إنه يعينك
و يديك القوة اللي تعيش بيها بالشكل اللي يرضيه
آمين