[Mary Naeem]

"لا تخف لأنى أنا معك .."
مسج وصلنى على موبايلى من رقم غريب يوم التحليل الصبح ..
الحكايه بإختصار يوم السبت اللى فات بعد الغدا فى الشغل حسيت بزغلله ودوخه , فا صحبى كان معاه جهاز قياس السكر , قيست السكر عشوائى لاقيته ٢٠٠ ..
قالى كيرلس انت كدا عندك السكر ولازم تروح لدكتور يطلعلك علاج ..
انا الكلمه دى وقعت عليا زى ماتقولى جردل مايه ساقعه فى شهر طوبا . ..
اتخضيت جامد وعرقت وطلبت من صحبى يوصلنى البيت ..
تانى يوم روحت عند الدكتور من النجمه ، عملت عنده تحليل صايم لاقيته ١٧٠ ..
قالى انت متأكد انك صايم قولتله يا يا دكتور انا من امبارح ماحطتش لقمه فى بقى ..
قالى دانت لازم تاخد علاج فورا عشان كدا ممكن تدخل فى مرحله الانسولين ..
نزلت من عنده وانا بسند نفسى بالعافيه ..
الفكره انى بحاول اقنع الدكتور انى مابكلش اى حاجه فيها سكر ومحافظ جدا على اكلى ، فا قالى اكيد ده سكر وراثى ومستحيل يكون عارضه وهايعيش معاك العمر كله ..
قالى بكره تروح تحلل سكر تراكمى وتجينى ..
روحت البيت وقفت فى البلكون وبصيت للسما ، صرخت صرخه حست انها طالعه من قلبى ..
قولتله يارب انا عايش لوحدى وحارم نفسى من كل حاجه عشان مايجينيش المرض اللعين ده ، وفى الاخر تبلينى به طيب ليه ؟؟
طيب افرض جاتنى غيبوبه وانا لوحدى اموت واعفن فى الشقه وماحدش بحس بيا !! ليه بس
يااارب انا واثق فى معونتك وواثق انك مستحيل هاترضالى بالشر ..
دخلت شربت مايه ونمت ..
صحيت لاقيت رقم غريب بعتلى آيه بتقول
" لا تخف لأنى انا معك "
روحت حللت تراكمى وطلعت على الدكتور قالى ايه ده !!
انت حللت امتى ؟ قولتله دلوقتى
قالى انت خدت علاج ؟
قولتله لا
قالى طيب تروح بكره عند المعمل وكتبلى اسمه وقالى تحلل صايم وفاطر وتراكمى وتجينى ..
روحت تانى يوم حللت ورجعت للدكتور ..
قالى مبروك انت خفيت اتفضل اطلع بره يلا ..
قولت فى بالى ايه ده ؟؟ بيترق عليا ليه
قولتله فى ايه؟؟
قالى مافيش حاجه اقولهالك بس انت ماعندكش سكر وماتسالنيش ازاى عشان انا مش عارف يلا امشى بقى. .
انا لحد هذه اللحظه مش عارف ازاى بس كل اللى واثق منه ان ربنا حقيقى حنين قوى
جيت ارن على الرقم اللى بعتلى الرساله لاقيته مقفول ومالوش اسم على الترو كولر ..
حاجات كتير مالهاش تفسير الا حاجه واحده بس ..
ربنا مراحمه واسعه قوى ..