[walaa farouk]

نسيت..

قصة على لسان اب موجوع : "نسيت نفسي" ..

نسيت انى "حيالله" بابا اللي ربي و تعب
و فنى نفسه علشان خاطر ولاده و طلع عينيه
و حطها هدية بسيطة بكل فرح لاولاده ..

نسيت انهم اتأمروا فى لما قالوا "يا بس" ،
و طلباتهم كانت أوامر و انا العبد
اللى بيعمل لهم اللى هما عاوزينه فى الوقت اللى هما عاوزينه ..

نسيت انى تعبت و شقيت و سهرت
و صرفت كل اللى عندى علشان اوفرلهم عيشة حلوة من غير ما يطلبوا ..

نسيت انى نمت و دموعى على خدى سنين
و انا قلبي موجوع من عِندهم و كبرهم و تعبهم ..

لكن ما نسيتش يوم ما طلبت من حد فيهم طلب بسيط ،
يعمله "بصباع ايده الصغير" ، و فى أقل من دقيقة
، فرد على و قالي "انا مش فاضى لك" ..

مع ان لو واحد صاحبه طلبه فى نص الليل فى اخر الدنيا ،
ينزل له جرى و "علي قلبه زي العسل" ،
و هو عارف انه اتقرص منه مرات و مرات ..

نسيت انى "حيالله" اب ..اب يدي و هو مش مستنى
، و ياخد فوق دماغه من ولاده ذل و بهدلة و قلة قيمة ،
و هو صابر و شاكر و راضي ..

و الجاي منهم اكتر و اكتر ..

نسيت ان ده تمن الابوة !!