[walaa farouk]

عمال تسأل: إيه هي مشيئة ربنا لحياتي؟
طب م الأخر كده، مشيئة ربنا لحياتك هي الصليب،
إيه رأيك هتقبلها؟!
آيًا كانت تفاصيل طريقك، لازم يكون في مجمله على شكل صليب كبير!
لكن أنت بترغي وتهري كتير، وتجادل،
وتفاصل في الوصايا والحق والظروف،
عشان تهرب من كل ما هو... صليب!
وعشان خايف تموت.. أو تخسر.. مش بتقوم ولا بتعيش!
الصليب هو السؤال الإجباري في امتحانات طريق يسوع المسيح.
مش المسيح قال لك: أحمل صليبك كل يوم واتبعني؟!
مش كل سنة بتنبسط وتتسلطن ب مراثي ارميا ٣ ف الجمعه العظيمة؟!
طب ما تشيل صليبك.. وانت ساكت.. زي ماهو مكتوب فيها!
مش أنت بتقول عايز تكون شبهه؟!
طيب هو عاش مصلوب، ومات مصلوب.
لما عرضوا عليه الملك.. أو انه يبقى قاضي.. هرب... وسكت!
ولما جابوا له.. متهمة ف ذات الفعل.. رفض دور الديان... وسكت!
مكنش بيقبل كل المعروض عليه
، او انه يلعب دور مش دوره لمجرد انه يرضي الناس،
او ان الدور شكله جميل، و ده نوع من الصلبان!
ولما دخل محاكمة نهايتها صليب،
واتطلب منه يدافع عن نفسه.. سكت!
لو كان اتكلم.. وأكيد كان هيعرف يتكلم كويس.. كانوا طلعوه براءة.
لو كان اتكلم وقت صليب الصمت.. كان عجبهم..
كانوا رفعوه لكن مش على صليب، وجعلوه ريس عليهم وقائد..
. وقاضي يقسم المواريث!
لو كان بس قال أي حاجة.. مكنش اتصلب.
ولو كان سمع كلام اللي حواليه.. قبل ما يتصلب
.. أو وهو جوة في معصرة الصليب..
كان هرب م الصليب ورفضه زي ما بطرس نصحه، او نزل من ع الصليب بمعجزة مبهرة، زي الجموع ما قالوا له.
أو حتى كان جدف على ابوه وهو مصلوب، زي ما نصحوا أيوب.
وانت كمان هتلاقي دايما صوت منطقي..
ومقنع.. بيقولك: اهرب م الصليب...
ماتتصلبش.. ولو اتصلبت هايقولك: انزل من ع الصليب..
. ماتكملش مصلوب.. ولو كملت هايقولك: متكملش وانت راضي كده..
وساكت.. اتكلم.. دافع عن نفسك واشرح.. طب جدف واعترض،
ده طبيعي على فكرة وحقك الانساني.
المهم إنك ماتشربش كاس صليبك لأخره،
عشان الصليب مش منطقي.. ومش مقبول بين البشر..
. ولإن عدوك عارف إن.. أخره.. قيامة❤️
يسوع.. ماتركش صليبه.. وما جدفش..
عشان كان عارف ان دي مشيئة ابوه الصالح..
وعشان الصليب كان بالنسبة ليه.. فرح وحب ومسرة..
. شرب كاسه كله.. ومات.. وقام.. وحوله ليك كاس الخلاص..
واما تنشغل بالمصلوب.. اللي حبك،
هاتقبل تنصلب معاه حبًا فيه، وتقوم معه❤️
وافتكر إن.. الصليب يأتي دومًا مصحوبًا..
بالصمت.. لنتفرغ من كل شيء ومن انفسنا..
ونتأمل ف حبيبنا المصلوب معنا❤️

مع_معلمي