[walaa farouk]

مريض الفكر ده من اكتر الناس
اللي بيحتاج تعاطف ودعم من اللي حواليه
مريض الفكر بيكون عايش في عالم لوحده مفهوش حد غيره
محتاج لايد حقيقيه تتمد ليه وتشده بكل قوه
لحد ماتخرجه بره قوقعته اللي حابس نفسه فيها

مريض الفكر بيتخيل سيناريوهات لكل شئ ، ويرعب نفسه بيها
رغم انها في معظم الاحوال بتكون سيناريوهات مابتحصلش
مجرد تتبع احداث حاجه بتدخله في حاجه تانيه وحاجه تالته

لحد مابيجيله اكتئاب بسبب زحمة افكاره

مريض الفكر ماينفعش يتساب لوحده
محتاج ينشغل طول الوقت علشان يتعافى من داء بقى ملازمه
مريض الفكر محتاج يدخل على السرير وهو فعلاً نعسان
لان للاسف السرير مع الهدوء بيكونوا ارض خصبه جدا
لنشاطه المؤلم

مريض الفكر ان حكالك تخوف جواه اوعى تتريق عليه
انت كده مش بس بتسحب ايدك من حياته
انك كمان بتقفل عليه اول تكه في قفل حابس نفسه جواه
حاول تساعده مش في انك بس تطمنه ،
لكن انك تثبتله ان اللي بيقولهولك مش صح

هو مابيكونش محتاج طمأنينه ، هو بيكون محتاج يتأكد انه غلطان

مريض الفكر محتاج دعم دائم
مستمع صبور
قلب يقدر بحتوي
بال طويل

اوعى تقوله ايه ياعم الافلام الهندي والخيال الواسع ده
او تقوله انت أوڤر اوي
لو معندكش استعداد تحل يبقى ماتسمعهوش تاني
لكن طالما سمعت اوعى تقلل من وجعه مهما كان تافه

— لو حاسس نفسك مريض فكر وبتقرا البوست ده
احب اقولك كم نقطه مهمه

- ماتسيبش نفسك لافكارك
- اشغل نفسك طول الوقت
- ادخل نام لما تحس انك فعلا محتاج تنام
- لازم تصدق ان كل السيناريوهات اللي في دماغك وهم ومش هاتحصل
- مابيحصلش في حياتنا غير الحاجات الواضحه من غير سرحان فكر ، مثلا مذاكرتش يبقى مش هاتنجح
ماتبقاش مذاكر وخوفك يصورلك فشلك لان الاستسلام للفكره هايخليك تفشل بجد
- احكي للي فعلا بيحبك مش للي قدامك وخلاص
- الحاجه اللي تخوفك انت مش مجبر تعملها ، اختار انسب قرارات تنيمك متطمن حتى لو وارد ماتعجبش غيرك
- لو بتقرا كلامي ومتفهمه فانت على البر ، اخرج من زحمة افكارك وصلي ودخل ربنا في حياتك ، بلاش تواجه لوحدك
- ماتقبضش قلبك بسبب وهم ولا تحرق دمك بسبب خيال ولا تتعب اعصابك بسبب سيناريو انت اللي مألفه
- ماتطاوعش الشئ اللي ياخد اكتر من حجمه جواك

خايف من الموت ! فكرك اللي هايقتلك
خايف من المرض ! فكرك اللي هايمرضك
خايف من السجن ! فكرك اللي هايسجنك

في مره كنت تعبان وعملت سيرش ، فالسيرش قلقني اكتر ماطمنيش
فلما رحت للدكتور وحكيت ليه عن تخوفي قالي جمله عبقريه مبروزها في حياتي لحد انهارده رغم ان فات عليها سنين

قالي الجهل بالشئ افضل من النص علم بيه
يعني انك ماتعرفش حاجه احسن
من انك تبقى عارف جزء وتخمن الباقي
يعني خلاصه الكلام تجاهل الاشياء
اللي ممكن تقلقك طالما انت معندكش غير احتمالات بسيطه ليها
ومعندكش تأكيد لباقي الاحتمالات الوهميه اللي في بالك

• واخيراً عايزك تجاوب على سؤالي بينك وبين نفسك
هل حصل واتحققت افكارك ومخاوفك الكتير
اللي مشقلبه حالك !! ولا هي بس بتكون صديقة الليل !!

نام واتطمن ربنا كاتب الاحداث
ماتحملش نفسك فوق طاقتها ❤️