[walaa farouk]

تخيل معايا لو انت زرعت زرعة عندك فى البيت
والزرعة دي بدات تكبر وانت مبسوط بيها
لكن فى حاجه غريبة حصلت ان بعد اسبوع او اسبوعين، الزرعة دة وقف نموها
هى بس كل اللى عملته ان بس هى اول يومين كبرت ووقفت عند كدة اكيد هتتضايق
واكيد هتحس ان فى حاجه غلط واكيد هتشعر ان مش دة الطبيعى اللى المفروض يحصل
المفروض ان كل يوم الزرعة دة يحصل فيها نمو ويحصل فيها تغيير وكل يوم لازم تشوفها بتكبر
اوقات كتيرة فى حياتنا بيحصل نفس الفكرة بالضبط
ان لما يجى نبص على حياتنا ونلاقى نفسنا واقفين فى نفس الخط واقفين فى نفس السلمة
نفس المشاكل اللى كانت موجودة من سنتين هى موجودة دلوقتى
نفس السلمة اللى كنت واخدها فى علاقتى مع ربنا هى نفس السلمة اللى انا واقف فيها دلوقتى
نفس الحاجة اللى فى علاقتى مع الناس اللى حواليا هى نفس الحاجه الموجودة دلوقتى،
فى لوقا 2 مكتوب كدة عن يسوع
" واما يسوع فكان يتقدم فى الحكمة والقامة والنعمة عند الله والناس "
لما كان الله بيبص بيشوف ان فية تقدم وتغيير
ولما كانت الناس تبص على يسوع كانوا بيشوفوا فيه تغيير ونمو
.. الحاجة اللى نفسى اقولهالك واقولهالى ان لازم يكون من وقت للتانى بنعمل تقييم لحياتنا
لازم نبص على الحاجات اللى بتحصل فى حياتنا هل فى نمو بيحصل ؟ هل فى تغيير بيحصل ؟
الفيلسوف الانجليزى جون هنيرى بيقول كدة ان الدليل على وجود حياة هو النمو ..
عاوز اشجعك انك تبص على حياتك الوقت اللى فات وتحط خطة للوقت اللى جاى
اية الحاجات اللى انت عاوز تكبر وتتغير وتنمو فيها مش بس فى علاقتك مع نفسك
وفى علاقتك مع الاخرين وفى علاقتك مع ربنا ✨🥰💡