[walaa farouk]

مش غريبة يا إيليا بعد ما تحقق أكبر النجاحات يحصل كدة؟!
أنت صليت المطر يقف ٣سنين،
وأنبياء البعل جبتهم الأرض في مشهد بيعلن قوة استجابة الله لصلاتك..
وقوة الله كانت مالياك، وكل الشعب بيتكلم عن إلهك
اللي عرفوه بسببك وانت تروح تكتئب بسبب كلمتين من ايزابل؟!
يقول الكتاب إنه مشي في البرية وقال
"قَدْ كَفَى الآنَ يَارَبُّ. خُذْ نَفْسِي لأَنِّي لَسْتُ خَيْرًا مِنْ آبَائِي.
"(الملوك الأول ١٩: ٤)
لكن يجي ملاك الرب ليه مرتين ويشجعه ويقوله قوم وكل..
وفعلًا قام ومشي بالأكلة دي أربعين يوم وليلة،
بعدها اتكلم الله ليه بكلام خاص..
الله قدر تعبه وإحساسه الإنساني..
في الملوك الأول ١٩: ١١
"فَقَالَ:اخْرُجْ وَقِفْ عَلَى الْجَبَلِ أَمَامَ الرَّبّ. وَإِذَا بِالرَّبِّ عَابِرٌ..."
فأخد إيليا قوة جديدة بعد ضعف بشري، ده الرب عبر عنده..

والله عنده تعامل مختلف الفترة دي لكل حد ماشي في طريقه..
التعامل الجديد مش لازم يكون بالشكل اللي أنت متوقعه، ولا بالأعمال الجبارة.. ببساطة البداية دي جت لواحد كان مميز صوت الله في الريح الخفيفة..
فلو جبت آخرك في طريقك معاه افتكر إنه إله كل تعاملات جديدة..

يمكن يجي في الوقت اللي بدأت فيه تفقد الأمل..
بس الأكيد إن "الرب عابر"💜