[walaa farouk]

بيحكي وبيقول
من فترة كان ماشي بالعربية ومعاه ابنه ، وقال يجيب ليهم حاجه يشربوها من الماركت
ركن قدام سوبر ماركت ونزل يجيب اللي هو عايزه
وفي اللحظة اللي بيحاسب فيها ومنتظر الراجل يفك الفلوس ويديله الباقي علشان مكنش فيه فكه
سمع صوت خبطه جامده جداً
بيبص لقى موتسكلين خبطين في بعض ومن قوة الخبطة طاروا على باب العربيه طبقوه
كان موتوسيكل ماشي بسرعه في طريقه مظبوط وموتوسيكل تاني جاي من شارع جانبي
برضه بسرعه قطع عليه الطريق
ومن قوة الخبطه اتحدفوا بالموتوسيكلات علي العربية وهي مركونه
الموقف عدى بحزنه وخسايره وكل واحد خد بعضه ومشي
لكن مخلصش من ذاكرة ابنه
اللي قاله هو ليه ربنا عمل فينا كده !
ده احنا راكنين علي جنب خالص والطريق قدامهم واسع وكبير
سكت الاب شويه وقاله
ربنا جميل جداً وغير مُجرب بالشرور
اللي خبطنا انسان ، مش ربنا
واللي خلاه يعمل كده تهوره ، مش ربنا
لكن تعالى نشوف قصاد تهوره ربنا انقذنا ازاي
وارد لو موقفناش نشتري حاجه من الماركت كنا احنا اللي خبطنا الراجل
اللي سايق الموتوسيكل وهو طالع بسرعه من شارع جانبي بكل تهور
ومش واخد في اعتباره ان بيقطع طريق
كان ممكن الخساير تبقى اكبر لينا وليه
ووارد لو كان صاحب السوبر ماركت اداني الباقي على طول
وموقفنيش لحد مايشوف فكه كنت خلصت اسرع واتخبطت منهم بدل العربيه
وانا رايح افتح الباب واتفعصت في النص
صحيح غلطتهم ، لكن ايد ربنا اتدخلت علشان تحل الموقف بانسب شكل وطريقه للكل
بيحصل حاجات كتير في حياتنا مؤلمة
لكن صدقوني ده بيكون اخف الم من سيناريوهات تانيه
ضيقه تخربش حياتك خربوش بسيط افضل من ضيقه تجيبلك مصيبه او تفعصك مابين انيابها
الحمدلله علي اللي ربنا بيسمح بيه لأنه اكيد احسن بكتير من اللي ربنا مانعه ومخبيه