[walaa farouk]

اب حب يعاقب ابنه علشان يعلمه درس
دخله اوضته وقفل الباب عليه بالمفتاح سِنِّتين
وقاله من انهارده مفيش خروج تاني ابدا
وكان كل يوم يفتح الباب بالمفتاح يحطله اكل
ويرجع يقفله سِنِّتين ( تَكِّتين )
الولد اتخنق من الحبسه ، وراح فتح الشباك
ومسك في فرع الشجرة اللي في الجنينه ونزل عليها
وهو نازل اتكعبل ووقع في الجنينه ورجله اتكسرت

بعد مرور اسبوع على الواقعه
ابوه دخله الاوضه اثناء مالولد نايم على سريره ومجبس رجله
وقاله اسمحلي اقولك اني طول الفتره دي سايبلك الباب مفتوح
انا بقفل سِنِّتين ، السِنَّه الاولى بقفل والتانيه بفتح اللي قفلتها
وانت طول الفتره دي مفكر الباب مقفول
علشان كده حاولت تخرج بطريقة تانيه
كانت النتيجه انها كسرتك

مش كل الابواب اللي بتشوفها مردوده مقفوله
فيه ابواب مش محتاجه غير يادوب زقه
بس احنا مابنخبطش عليها لاننا مستعجلين الخروج
بنختار الطرق الاكثر تعقيداً
بنختار السكك اللي توقعنا وتجرحنا وتكسرنا

- سوء الحالة النفسيه لشخص حاسس انه محبوس في دايره ومفيش امل يخرج منها
بتخليه يستسهل اصعب الطرق ، المهم انه يخلص
رغم ان الخلاص وارد يكون نتيجته هلاك

- علشان تقدر تخرج من همك اللي محبوس دلوقتي جواه
فكر بتأني ، وشوف فيه كام باب حواليك
ايه الابواب المتربسه وايه الابواب المواربه
لان مش كل موارب مقفول …

الحياة اوضة مليانه ابواب ، ماينفعش كلهم يتقفلوا

👈 اهدى واتطمن ❤️
واتأكد ان اللي شق بحر بحاله
، اكيد مش هايصعب عليه يفتحلك حتة باب
بس انت طول بالك وخبط
—