[walaa farouk]

أكبر درس وصل لي من موضوع غواصة تيتان
وهو مش درس فيه دروشة في موضوع الفقر
و الغني زي اللي قالوا شوفوا الاغنيا نهايتهم إيه والكلام ده
.. لإن أحنا منعرفش فيه أغنيا كتير أحسن من فقرا كتير
( مش بتتقاس كدة )

لكن درس عملي
هو مقطع من ترنيمة بيقول
عمرك غالي ليه بتغامر بيه بخسارة !

بلاش تخاطر بحياتك في مخاطرة إنت عارف انها كبيرة
حتي لو عارف ان فيها نسبة استمتاع كبيرة
و هتعلي الدوبامين و الادرينالين بدرجة رهيبة بس فيها مخاطرة بحياتك ..

و مش بس اللي نزلوا لاعماق المحيط الاف الكيلومترات
هما اللي خاطروا بحياتهم
.. لكن فيه انواع مخاطرة كتير انت بتخاطر بيها بحياتك ..

اللي بيروحوا لسكة ال م/خ/د/ر/ا/ت
هما عارفين ان فيها استمتاع بس عارفين انهم هينزلوا سكة
الطلوع منها صعب جداً ..
و الشخص بيعيش ميت و مُغيب ( غايب و مفقود عن الحياة)
زي المفقودين دول بالظبط .

اللي بيروح سكة علاقة عارف ان فيها مخاطرة كبيرة
و إنه هيدمنها رغم انها مؤذية لروحه و نفسيته بس بيصمم علشان شوية إستمتاع نفس المخاطرة بالظبط .

و حتي في الشغل و أكل العيش
لو بتشتغل في شغلانة البناء او التكييفات او ماشبه ،
بلاش تعمل خطوة فيها تسلق لمباني
فيها مخاطرة بحياتك حتي لو هتضحي بالفلوس .

الخلاصة :
عمرك غالي ووزنة ثمينة جداً
إدهالك ربنا بكل حب و سرور علشان تستثمر بيها
و تطلع منها أحلي حاجة لحياتك و حياة الناس حواليك
.. بلاش تفقدها بغباء أو جنان أو مخاطرة مش محسوبة
و انك تفقد حياتك مش بس إنك تموت بالجسد
لكن كمان لو عشت بطعم موت انت كدة فاقد لحياتك .

سليمان الحكيم كتب كدة من خبراته :

"لاَ تَكُنْ شِرِّيرًا كَثِيرًا، وَلاَ تَكُنْ جَاهِلًا. لِمَاذَا تَمُوتُ فِي غَيْرِ وَقْتِكَ؟"
(جامعة 7: 17).

يعني ممكن بشر أو جهل تنهي حياتك قبل ميعادها
، سواء إنك تنهيها حرفياً أو معنوياً

ربنا يدينا الحكمة نحافظ علي حياتنا و منغامرش بيها مخاطرة
مش محسوبة و فيها إحتمال إنها تموتنا سواء موت جسدي أو معنوي

✍️