[walaa farouk]

الطبيب كتب في الروشته الادويه المطلوبه
وكتب تحت الادويه
الجسم هيستجيب للادوية بالتدريج والاستشاره بعد اسبوعين
الاب اشترى الادويه ، وبعد اسبوعين بالفعل تم الشفاء
الأم قطعت الروشته ٢٠ حته ، لان خلاص ابنهم خف
ورمتها من الشباك
الورق طار في الهوا وكل حته منه طارت في اتجاه

كان فيه شخص ماشي مكسور ، كان جواه عتاب كبير اوي لربنا
لان كل اللي اتمناه ماتحققش
وصلاته دايماً غير مسموعه
قال لربنا في اخر صلاة ليه
مش هاصلي تاني غير لما تقولي انك سامع صلاتي
انا حقيقي تعبت ، ومكنش عندي غيرك الجأ ليه
اتحوجت لناس مكنوش قد الثقه باعوا واشتروا فيا
ولناس تانيه استغلوا وجعي
ولناس تالته قفلوا بابهم في وشي
وغيرهم كتير ..
ودموعه كانت سابقه عتابه طول ماهو ماشي

ربنا اراد من كل الورق اللي اتقطع وطار
تيجي عليه الورقه اللي مكتوب فيها " هيستجيب "

صاحبنا اتصدم ! ده جايه من فوق ، كانت طايره في الهوا
يعني مش مرميه على الارض
دي اكيد من السما

رجع بيته ودخل اوضته يصلي بحراره وبدموع
ويتأسف عن سوء ظنه
ربنا حققله اللي اتمناه بعد شهرين من تاريخ سقوط الورقه على راسه
وكأن ربنا بيصبره وبيطمنه انها هانت

وانت كمان صدقني خليك واثق انها هانت
جايز مفيش ورق يوصلك ، بس فيه مليون حاجه تانيه بتحصل حواليك
تأكد ان ربنا موجود وشايف وسامع وحاسس وعارف

اعتبر الكلام ده هو الورقه اللي جاي اقولك بيها هانت
اعتبرني انا ياحبيبي الورقه اللي جايه تقولك
" هيستجيب "