[walaa farouk]

قاسي جدًا إنك تعيش وضع صعب نتيجة ظروف حصلتلك إنت مالكش دخل فيها..
يعبيص مذكور عنه في الكتاب المقدس إن أمه سمته بالإسم ده علشان ولدته بحزن..
غالبًا إتعرضت لظروف صعبة وهي بتولده
معنى إسم يعبيص (المُعذّب أو المُكدّر)..
ياه.. إسم صعب وهيفضل ملازمه طول عمره.. ومش بس كده ده كمان ظروفه سيئة..
لكن تخيل..! الشخص المُعذَب ده صلّى صلاة من أجمل الصلوات اللي سمعنا عنها..
قال:
«لَيْتَكَ تُبَارِكُنِي، وَتُوَسِّعُ تُخُومِي، وَتَكُونُ يَدُكَ مَعِي، وَتَحْفَظُنِي مِنَ الشَّرِّ حَتَّى لاَ يُتْعِبُنِي».
فَآتَاهُ اللهُ بِمَا سَأَلَ. (أخبار الأيام الأول ٤: ١٠)
إيه الكلام الرائع ده.. وإزاي يطلع من شخص حزين مسكين إتعرض لظروف قهرية أقوى منه..
هي دي نعمة الله.. هو ده صلاح الله
الإله الرائع الصالح اللي مليان رحمة وجود.. إتعامل مع يعبيص وشفى نفسيته وفكّها من كل حزن ووجع..
باشجعك لو بتقرا الكلام ده دلوقتي..
ويمكن بقالك وقت بتندب حظك.. ومستسلم لفكرة إنك عايش وضع مالكش ذنب فيه.. وبتبكي بحُرقة..
صدّق في إله كل نعمة.. صدّق إنه يشتغل جواك بروحه الوديع الشافي..
يفك شفرات قلبك المقفول على ألمك ويتعامل مع روحك الهزيلة المريضة ويشدّدها..
إلهك أقوى من كل ظروف وتحديات.. أقوى من أي واقع مخيف..
إهدا وسكّن قلبك جوه إيديه الكريمة..
#إله_كل_نعمة