[walaa farouk]

وبعد ما الحفله خلصت والابن رجع لابوه
اتقفل الباب وبقوا لوحديهم
دار الحوار ده بينهم

الابن (انا) … بابا ممكن طلب
الاب (يسوع): أأمرني انت طلباتك اوامر انهارده اليوم يومك
الابن (انا): ينفع تحضني تاني
الاب: طبعا تعالي انت اصلا حضنك وحشني
الابن (انا): هو انا تعبان يا بابا تعبان حقيقي
انا فرحان اني معاك بس جوايا تعب مش عارف يروح
جوايا غضب وحزن
جوايا احتياج
جوايا احساس بالزل والاهانه
جوايا جرح
جوايا وجع
انا مش فرحان كفايا
الاب: انا حاسس بيك
الابن (انا) .. لا اكيد زعلان ومفروض اسمع منك
انت تفرح بيا انا بس وكل ده
بس انا تعبان حقيقي
الاب: بص يا حبيبي انا عارف انك تعبان
وانا مش عاوزك كويس مره واحده انا عاوزك تاخد وقتك
لان الموضوع مش سهل ووجعك مش عادي
انا اب وفاهم وانا وانت هانمشي سوا سكه شفًا من اوجاعك
انا مش طالب منك حاجه غير انك تفضل معايا
الابن (انا).. هاتزعل مني لو مش قادر اتكلم
بس عاوز اعيط في حضنك بس ؟
اللي: لا مش هازعل ما هاعيط جنبك مش انا قولتلك قبل كده بكاءا مع الباكين
الابن(انا).. انا بحبك بس حقيقي موجوع
الاب.. وانا وجعك جوايا اصبر بس وانا جنبك
الابن (انا) .. يا بابا انا …
الاب.. كفايا كلام وارتاح
الابن(انا)… انا حاسس اني لوحدي لا هو انا حرفيا لوحدي
انا ليا مين. اخويا واديك شايف .
صحاب ومافيش خلاص .فلوس ومعاييش
كل حاجه وجع وتعب
الاب:.. انا جنبك
الابن(انا).. ممكن تنام معايا في اوضتي انهارده
الاب: انا معك كل الايام والي انقضاء الدهر. تعالي في حضني
(وابتدت الحكايه )