[walaa farouk]

"نشكر ربنا" .. أشهر رد لما حد يسألك عن حالك و ظروفك
او حتى مرضك أو وقتك الصعب ..😔
حتى لو هتكمل بعدها وتحكي عن ظرفك الوحش
لكن غالباً بتبدأ كلامك ب"نشكر ربنا" ..🙏
و قد إيه مشاعر الإمتنان لله دايماً حاجة مميزة ..
لكن لو للحظات بشكل صادق تجاهلت النطق اللفظي لعبارة "نشكر ربنا" وبصيت جوايا على اللي مش منطوق ..
هل هالاقيني بنفس مشاعر الإمتنان فعلاً ولا الموضوع مختلف ..

هو بس لو تديني الحاجة الفلانية .. يبقى "نشكر ربنا" بجد 🙏
هو بس لو تسكنني في الحتة الفلانية .. يبقى "نشكر ربنا" بجد 🙏
هو بس لو تشغلني في المكان الفلاني .. يبقى "نشكر ربنا" بجد🙏
هو بس لو تعيشني العيشة الفلانية .. يبقى "نشكر ربنا" بجد 🙏
وكأني عاوز أقول هو بس لو يبقى معنديش إحتياجات
.. يبقى "نشكر ربنا" بجد 🙏

والفكرة دي لما بأسيبها تكبر جوايا في اللاوعي بتحول علاقتي
بالله لعلاقة من طرف واحد فيها انا الطفل اللي هيفرح
وينبسط بس لما بابا نويل يجيب عطاياه المميزة ..🥰🤩
واحد من أوضح الفروق بين العلاقات الفاترة والعلاقات القوية
.. إن العلاقة مبنية على شخص مش رابط قوة وجمال العلاقة
بمنح وهبات الشخص التاني ..
انا هاشكرك طول الوقت في كل الظروف ..
مش لأنك بتديني اللي عاوزه لكن
هاشكرك لأنك ابويا الصالح اللي عندك خيري
مهما منحت أو منعت ..💜