[walaa farouk]

لو رشحتلك فيلم حلو جداً تتفرج عليه .
. لكن و إنت بتتفرج قعدت خمس دقايق وبعد كده مشيت ..
ورجعت بعد شوية إتفرجت على عشر دقايق تاني وبعدها برضه مشيت .. ورجعت بعدها تاني اتفرجت علي 10 دقايق وبرضه بعدها مشيت ..
ولما سألتك عن الفيلم قولتلي "الفيلم بصراحة معجبنيش
.. الفيلم بايخ"

ومع فارق التشبيه لكن كتير بيكون ده شكل علاقتنا مع الله ..
الله دايما دعوته "للكل" .. واحنا مُصرين نحولها "لجزء"
.. ونسيب باقي الأجزاء لإختيارات تانية بعيدة عنه ..
يعني مثلاً
انا بأحب الله فعلاً وعاوز اديله وقتي لكن مش كل الوقت
انا بأحب الله فعلاً وعاوز اديله طاقتي لكن مش كل الطاقة
انا بأحب الله فعلا وعاوز اديله تفكيري لكن مش كل الذهن
انا بأحب الله فعلا وعاوز اديله فلوسي لكن مش كل الفلوس
تحديات صعبة يومية بتعلن إني خايف أكون بأدي "الكل"
برغم الوصية الأولى والعظمى مكانتش تحب الرب الهك من قلبك
ونفسك وفكرك
... لكنها كانت من"كل" قلبك و"كل" نفسك و"كل" فكرك ..
الأهم إن تحويلنا "الكل" إلى "جزء" خلى النتيجة إن علاقتنا الحية الممتعة معاه بتتحول لعلاقة بايخة فاترة، فيها انا بأدي "جزء" من كل حاجة و آجي بعد كده مندهش انا ليه مش مستمتع بعلاقتي مع الله!!

و الله يكون مستني زي الأب وهو واقف
وبيقول عشان تستمتع بالعلاقة معايا لازم تعيشها كلها على بعضها
مش تاخد منها اجزاء
وتجري في علاقة متقطعة فاترة مفيش فيها طعم لأي حاجة ..

#من_برّه_هالله_هالله
#تغيروا