[walaa farouk]

ساعات بنقول علي علاقات مشوهة انها حب و هي في الحقيقه ابعد ما يكون عن الحب الواعي الناضج المسئول... و دي شويه امثله للحب المشوه

+ (حب امتلاك)
... يعنى حد بيحب حد عشان يمتلكه و يستحوذ عليه لنفسه فقط... كانه اشتري انسان و بيدفع فيه مبلغ من المال مع قليل من المشاعر عشان يكون الموضوع شكله حلو
+ (حب الطاعه)
... حد عاوز من الطرف التاني طاعه عمياء... لا نقاش و لا جدال و لو هنتناقش يبقي مش بتحبني.. انت تقول حاضر و بس مش مهم نفسيتك ولا شخصيتك ولا افكارك اللي المفروض تتلغي لانها ملهاش لزمه
+ (حب الابتزاز)
... حد بيستخدم الابتزاز علشان يتحكم في اللي قدامه مره بمشاعر الذنب و مره بالتهديد و مره بالصعبانيات
+ (حب تفصيل)
.. اللي عاوز يفصل الطرف التاني علي مقاسه و يغير خريطه حياته و تركيبته ده كله لاني متعلق بشويه صفات عجباه و الباقي مش عاجبه بس هيتغير عشان يكون مرتاح
+ (حب جسدي) .
.. حب مبني علي الشكل الجميل و المتعه الجسديه ومعاها شويه مشاعر و كلام حلو عشان يكون الموضوع مقبول
+ (حب المرقعه)
... مش عايز اتعب اتعب انت... مش عايز اشتغل اشتغل انت... مش عايز اشيل مسؤليه شيل انت... مش عايز انضج كفايه انت ناضج ... انا احب و بس و انت قدم مجهود مقابل شويه الحب بتوعي
+ (حب القيمه)
... ده واحد حاسس انه مايستهلش يتحب اصلا و لما بيلاقي حد يحبه يمسك فيه بايديه و سنانه عملا بمقوله حب اللي يحبك
+ (حب حاله الحب) .
.. بيحب حد يكلمه في التليفون و يبعتله كلام حلو و يسهروا بالليل بالساعات لغايه ما الفجر يطلع.. يطمن عليه لما يتعب و عنيه تطلع قلوب لما يشوفه... يعني حب رومانسي من بتاع الافلام
+ (حب خلط الادوار)
.. الراجل اللي عايز مراته تبقي امه... و الست اللي عايزه جوزها يبقي ابوها

+ الحب زي السباحه مهما قريت عنها بدون ممارسه و تدريب مش هتقدر تتقنها و ساعه الجد هتغرق في شبر مايه و معلوماتك مش هتنفعك .. الحب بيحتاج انك تعيشه الاول و تختبره مع اهلك و اصحابك و تمارسه مع اعدائك و نتيجه لنجاحك هتقدر تميز بين الحب الحقيقي و المزيف