[walaa farouk]

كنت بدور علي معنى مصطلح " رمينا طوبتهم "
فقريت ان رعاة الغنم زمان قبل اختراع الارقام
لما كانوا بيرعوا الغنم ومش عارفين عددهم
كانوا بيحطوا لكل غنمه طوبه
فالغنم اللي كان بيطلع ياكل ويرجع كان بيقف قدام طوبته
وفي الاخر يبصوا علي الطوب اللي باقي
الطوبه اللي مكانها فاضي يعرفوا ان الغنمه بتاعتها مارجعتش
ومش راجعه تاني
فايفقدوا الامل فيها ويرموا طوبتها

فالمصطلح اتطور مع الوقت وبدا يتم استخدامه
بقي في الحياة عموما
اب فقد الامل في ابنه يقوله انا رميت طوبته
زوجه فقدت الامل في زوجها تقول انا رميت طوبته
وهكذا ..
حقيقي اتفاجئت من اصل الجمله رغم انها على لسان كل واحد فينا

ولما سرحت شوية في الجمله واتأملتها
لقيت اننا احيانا بنرمي طوب ناس كتير مارجعوش في المكان اللي كنا شايلينه ليهم
خرجوا ورا دماغهم وافكارهم والكلام الغلط اللي سمعوه
وسابوا مكانهم الحلو اللي كنا حطينهم فيه
استنيناهم يرجعوا لكن مارجعوش
فرمينا طوبتهم علشان مانضيعش عمرنا في مرارة الانتظار
رمينا طوبتهم علشان مانتديش لنفسنا فرصة نستناهم
رمينا طوبتهم علشان ننساهم زي مانسيونا ومانزعلش عليهم
رمينا طوبتهم علشان مايستحقوش نبكي عليهم
رمينا طوبتهم علشان هم اللي اختارو ده
رمينا طوبتهم علشان مايتبقاش لينا حاجه تفكرنا بيهم

رمينا طوبتهم .. يعني فقدنا الامل فيهم
وفقد الامل اسوء شئ ممكن يوصله شخص عشمان

مايكل سامي

👈