[walaa farouk]

اليومين دول كذا حد طلب مني طلبات صلاة
عشان تسديد احتياجات البيوت والعلاج ومصاريف المدارس..
حقيقي كل الناس حاسين بالزنقة دي
مهما كان المستوى المادي عالي أو بسيط...

رفعت قلبي لله وقلت له: أنت قلت "وهذه كلها تزاد لكم"
، وبقيت أحط اسم كل حد وكل أسرة
وأقوله دول ولادك زود ليهم الخير .. بارك القليل...

نطت في دماغي الآية "الأَشْبَالُ احْتَاجَتْ وَجَاعَتْ،
وَأَمَّا طَالِبُو الرَّبِّ فَلاَ يُعْوِزُهُمْ شَيْءٌ مِنَ الْخَيْرِ". (المزامير ٣٤: ١٠)
غريب أنه شبل قوي يجوع ويحتاج، ده سهل يلاقي فريسة ويشبع🦁
لكن داود ذكر أنه حتى لو ده حصل، هو هيفضل شاهد عن تدبير الله الصالح ليه وهو في مغارة عدلام🙏🏻..

تخيلت أنه يمكن حقيقي حواليه أشبال بتزأر
أو يمكن يكون قاصد أشخاص أقوياء، وتعبيره ده تعبير معنوي..
أيًا كان التعبير حقيقي أو معنوي أكيد داود اختبر خير استثنائي لأنه معتمد على صلاح الله نفسه، اختبر إنقاذه من الفلسطينيين لأنه طالب الله بأمانة..

لو إنت مسئول عن معيشة ناس في رقبتك وزي ما بيقولوا العين بصيرة واليد قصيرة😰..
لو إنت متكفل بعلاج مريض في بيتك والحمل تقيل ومش عارف تكفي🥹...
لو شايل هم مصاريف مدارس أو جامعة خاصة عشان تفرح ابنك او بنتك👨‍👩‍👧‍👦...

👈🏻افتكر أنه بابا السماوي عنده الخير ليك💜...
👈🏻 وبشكل أدق هو عنده كل الخير لدرجة أنه "مش هيعوزك شيء من الخير"💜..
👈🏻لو كل الطرق البشرية لحل ازمتك خلصت هو عنده خير استثنائي💜..