[walaa farouk]

"نهونها على بعض علشان تهون".
أجمل جملة سمعتها وريحتني وياريت كل الناس تفهمها وتمشي بيها..
الحياة مش مستاهلة عتاب تقيل وتأنيب ضمير..
مش مستاهلة تروح تقول لحد كلام رخم تكرهه في نفسه..
فيه ناس كتير بتضحك من غلبها، من همها ومن الشيلة التقيلة اللي شايلاها..
خليك دايما خفيف الظل، مريح في التعامل..
ما تعلقش لحد حبل المنشقة لمجرد انه نسي حاجه كنت طالبها مثلا وهو مين ما بينساش..؟
مين الدنيا مش طاحناه وماشي يزق في اليوم بالعافيه..؟
نهونها بكلمة حلوة، بحضن في وقت غضب وضحكة تشرح القلب وتنسي الهم..
اضحك لو مهموم، بص لبلاوي غيرك وانت تعرف انك في نعمة وأحسن حال..
حد اختفى من حياتك وظهر لما احتاج منك حاجه، وماله؟
اوعى تقول ده بتاع مصلحته..
مش يمكن ربنا سخرك ليه وانت مش عارف، يجازيك خير لما تساعده..
أنا عن نفسي برحب بأي حد محتاج مساعدتي حتى لو هو ده اللي بينا بس..
ببقى في قمة سعادتي لما أحس أني أثرت في حد تأثير حلو وهيبقى ليه ذكرى حلوة..
أنا عايز أبقى ذكرى حلوة.. يارب خليني دايما في سيرة الناس طيب
، حنين وجميل الروح قبل الشكل..
وأوعى تنسى نصيحتي ليك وحطها دايما قدام عينيك..
"نهونها على بعض علشان تهون"...