[walaa farouk]

مرة وأنا في سن جامعة كان عندنا حفلة في الكنيسة وكنت لابسة فستان وجزمة جديدة ورايحة فرحانة أوي و كل اللي كان بيشوفني كان بيقولي كلمات حلوة وأنا الصراحة كنت مبسوطة أوي 🙈
لحد ما القائد بتاعي جه وراح قالي عايز أقولك حاجة
طبعا قولتله قول وجهزت وداني وقلبي وعقلي أني هسمع كلام حلو أوي عن شكلي المختلف النهاردة 🙉
لكن الحقيقة الرد فاجئني.. قالي :
"خِزَامَةُ ذَهَبٍ فِي فِنْطِيسَةِ خِنْزِيرَةٍ الْمَرْأَةُ الْجَمِيلَةُ الْعَدِيمَةُ الْعَقْلِ".
طبعا أنا مفهمتش حاجة وقولتله يعني إيه بقى؟! 🙄
راح فسر لي معناها وكان قريب أوي من الترجمة دي
المَرأَةُ الجَميلةُ العارِيَةُ مِنَ الفَهْمِ حَلقَةٌ مِن ذَهَبٍ في أَنفِ خِنْزير.( ت.ك.ع )
وقالي جملة بعدها عمري ما نسيتها الحقيقة، قالي أوعي تهتمي بالجمال الخارجي أكتر وتسيبي عقلك وقلبك مضلم أنا عايز اللي يشوفك ينبهر بجمال روحك وعقلك زي شكلك كدة وأكتر 😮 لأن الجمال من غير عقل حماقة وعديم الفايدة زي الآية دي ما بتقول شبه الذهب في مناخير الخنزير كدة 😑

يمكن أكون زعلت وقتها وحسيت أنه كان قاسي جدا في كلامه معايا .. بس كل ما بشوفه دلوقتي بقوله شكرا عشان الكلمات دي دايما بتنور قدامي وتفكرني أن شغلي علي نفسي وتطوير مهاراتي والتدريبات لروحي وعقلي دايما هي الأهم 🧡


زي ما بتجتهدي تدوري في الحاجات اللي بتنور الوش والجسد ، اسألي واصرفي وقت ومجهود وفلوس على حاجات بتنور العقل والروح وتخلي كلامك ومشورتك دايما محبوبة ومطلوبة .
خلي جمالك من نوع مختلف 😉

#قال_في_الأمثال