[walaa farouk]

ضربنى بوشه على ايدى

هذا "الافيه" المصرى العبقرى يعبر عن حال كتير من اللى بيحصل ..

تلاقيه ظالم و غلطان و الغلط راكبه من ساسه لراسه
، و بدل ما يعترف بغلطه يركبك انت العيب و يقول "للشر اشتر" ..

و دى اسمها نظرية الصوت العالى ، أو على رأى المثل القديم
"الغلّاط سيد جيرانه" ، يعنى يببقى غلطان
، و يركبك الغلط بسوء لسانه ..

و الناس دول لا بتعرف تاخد معاهم لا حق و لا باطل
.. اصل طالما ارتضى يظلمك و يقبل انه يموت ضميره يدى لنفسه العذر ، يبقى الكلام ما لوش فايدة و لا لازمة ..

بس اطمن دول مالهمش غير القانون الالهى،
لان عدل الله هو حاكم الكون ..

حقك اللى راح ح يرجعلك لغاية رجليك و بالفوايد ،
بس بشكل مختلف (احسن الف مرة )
و بعد شوية وقت (لزوم الخطة الالهية و لزوم امتحان ايمانك و صبرك ) ..
يعنى لو مثلا ظلم فى الشغل ممكن يترفع عنك
، او ربنا يديك حقك فى شغل احسن و مكان أرقى و بعد شوية صبر ..

كمان اللى ظلمك وخد حقك (من غير ما تطلب و لا تتشفى فيه) ، لا ح يتهنى بيه و لا ح بشوف فيه يوم راحة ، و كمان زى ما ظلمك ح يتظلم (الا لو رجعهولك و ده غالبا ما بيحصلش لقساوة قلبه) ..

ما تخافش، ربنا سهران على حقوقك و حقوق كل ولاده ..