[walaa farouk]

ناس فاضية حاطينك في دماغهم..
وماعندهمش حاجة غيرك..
بيحاولوا يبوظوا أي حاجة بتعملها 😈

دا نفس اللي حصل زمان مع اسحق في سفر التكوين أصحاح 26
الفلسطينيين اللي كان عايش وسطهم ردموا كل الآبار اللي حفرها وتعب فيها إبراهيم، وقالوا لإسحق "امشي من عندنا ماتقعدش في منطقتنا تاني" ❌
إسحق بكل هدوء سابهم واتحرك لمكان تاني، وابتدى يعيد حفر الآبار اللي اتردمت في المنطقة الجديدة دي، وهو كمان حفر آبار جديدة علشان يبتدي يعيش في المنطقة دي.
وبرضو اتخانقوا معاه على الآبار وطردوه وماحدش سابه في حاله.

لكن الغريب في القصة إن تالت مرة لما راحوا لإسحق، ماكانوش رايحين يطردوه..
كانوا رايحين يعملوا معاه معاهدة سلام 🤨 وقالوله كدة:
"الآنَ رأينا أنَّ الرّبَّ معَكَ، فقُلنا: لِـيكُنْ حِلفٌ بَينَنا وبَينَكَ
، ولنقطَعْ معَكَ عَهدًا"

أنت متخيل إن الناس اللي كانوا حاطينه في دماغهم
وبيتفننوا إزاي يئذوه، هم نفس الناس اللي رجعوا يكسبوه في صفهم؟

❓ عشان إيه؟؟
عشان شافوا إزاي ربنا معاه وبيباركه، ودا ماجاش من فراغ
.. لكن لأن إسحق كان فعلًا قريب من ربنا وماشي ورا كلمته
، والله هو اللي قاله "أقعد في المكان ده، وأنا هاباركك"

ماتشغلش بالك بالأذية والناس اللي بتحاول تحبطك وتفشلك وتحاربك طالما واخد وعد وكلمة من الله، هم نفس الناس اللي هيقفوا يتفرجوا عليك وأنت متبارك وناجح لأن الله بنفسه في صفك وقال كلمته.