[walaa farouk]

عشرين نصيحه وارد تحتاجهم



١- ماتشتغلوش شغل ماتكتسبوش منه خبره لانكم لو مشيتوا هاتبدأوا من الصفر

٢- مش كل التجارب الفاشله اللي الكل صرح بفشلها ، انت كمان تفشل فيها
وارد تكون الحاله الشاذه اللي الناس تتكلم عنها
جرب الاول واحكم

٣ - ماتبكيش على بايع اكتر من ٣ دقايق ، والبكا هنا مش عليه لكن على خيبتك

٤- ماتبصش وراك علشان ماتتحولش لعمود ملح ، بص قدامك وانسى الماضي ينساك

٥- عاتب اللي ليه ودان تسمع ، مش اللي ليه لسان يقاوح

٦- امسحوا رسايل الماسنجر والواتس اب اول بأول 😂

٧- حافظوا دايما على المسافه اللي بينكم وبين الناس علشان فيه منهم بيعض فجأه

٨- اوعى تصدق مقولة العيش والملح ، ياما ناس أكلتهم طفاسه

٩- ماتعملش خاطر لحد على حساب اهلك او نفسك

١٠- مين قال انك فاشل ! كل انسان مميز في حاجه معينه ، ولو مالقتش حاجه مميز فيها فانت الانسان المميز في عدم تميزه بشئ

١١- ماتحكيش غير لما الحاجه تكمل ، مش علشان العين فلقت الحجر والكلام ده ، لكن علشان العين فعلا فلقت الحجر

١٢- اعمل اللي يريحك ، مش اللي يفرح غيرك

١٣- لو اتكسفت من البجح ، هاتنام كل ليله بتغلي وتقول يارتني رديت

١٤- عامل الناس حلو مش علشان هم حلوين لكن علشان انت متربي

١٥- ارتبط علشان حبيت ، مش علشان وصلت لسن الارتباط

١٦- اوعي تسمح لحد يهين اطفالك قدامك فايفقدوا الثقه فيك ، ربيهم كويس علشان ماتتحطش في موقف زي ده

١٧- انت اللي بتحدد للناس تعاملك ازاي ، فبلاش تبقى سلبي للدرجه اللي تتركب بسببها

١٨- اوعي تخبط باب مرتين ، ان ماتفتحش من اول مره ، رن الجرس في التانيه واجري

١٩- ماتحكمش على شخص من خلال اللي بيكتبوا ، محدش هايكتب انا وحش

٢٠- النصيحة الاخيره في هذا البوست ، مش كل اللي بكتبه ضروري يكون صح