[walaa farouk]

قبل مجيء المسيح للعالم...
كان الموت بالنسبة للبشر نتيجة للخطية...
وده بحسب اللي قاله الكتاب المقدس
"لأَنَّ أُجْرَةَ الْخَطِيَّةِ هِيَ مَوْت" (رو6: 23)...
لكن بعد مجيء المسيح وموته وقيامته...
اترفع عنا حُكم الموت وأصبح لينا حياة في المسيح...
بس الواقع بيقول إن لسة الناس بتموت لحد دلوقتي...
فهل في تفسير لموت الناس بعد قيامة المسيح..؟!
الحقيقة الموت هو النتيجة الحتمية
للحياة وسط عالم ساقط وشرير...
والمؤمن بالمسيح بيختبر الموت الجسدي
لأن الخليقة لسة فيها فساد...
ورغم إن المسيح اعتقنا من عبودية الخطية والموت...
إلا أن أثار السقوط والخطية لسة موجودة في العالم...
علشان كده الله وعدنا إن الخليقة دي
كلها هتتجدد وتتخلص من الخطية
لكن ده هيحصل في مجيء المسيح التاني...
ولحد ما المسيح يجي كل المؤمنين مُعرضين
إن حياتهم تنتهي في وقت معين ويموتوا...
ولكن موتهم مختلف عن موت باقي الناس...
لأن بعد انفصال روحهم عن جسدهم في الموت...
بتنطلق أرواحهم مباشرةَ وبتكون مع المسيح...
وده اللي خلى بولس يقول: "لِيَ اشْتِهَاءٌ أَنْ أَنْطَلِقَ وَأَكُونَ مَعَ الْمَسِيحِ،
ذَاكَ أَفْضَلُ جِدًّا" (في1: 23)...
الموت أمر مؤلم ومخيف لينا كلنا...
ولكن المسيح أعلن نصرة على الموت بصليبه وقيامته...
ووعدنا إنه هيجي تاني وينهي على الموت تماماً...
ولحد ما مجيئه لازم نعيش بنتقوى
وانتظار واشتياق لوجودنا معاه للأبد...