[walaa farouk]

واحدة من أكتر الخطايا..
اللي الإنسان بيخجل منها عامة هي (خطية الزنا)
وخصوصا بقى لو واحدة ست، عايشة في مجتمع شرقي
يهودي أصلا بيحتقر المرأة بصفة عامة
وكمان بيدينها جدا لو بتخطىء خطأ زي دا،
لكن يحكيلنا الإنجيل عن حادثة غريبة من نوعها
عن واحدة ست زانية (وسمعتها سابقاها في الموضوع دا)
تعرف أن المسيح قاعد يتعشى في مكان اسمه بيت عنيا،
وهي كل اللي شاغل بالها إزاي تقدم توبة صادقة حقيقية
متغلفة بمحبة عميقة للمسيح اللي محبته وقداسته غمرتها
وأسرت قلبها وغيرت حياتها. وقررت تروحله هناك في البيت
قدام التلاميذ والناس اللي قاعد معاهم
وتآخد اغلى حاجة عندها ممكن اي بنت تمتلكها في الوقت دا
(زجاجة عطر غالية جدا) .. واول ما توصل وتلاقيه قاعد
تكسر الإزازة وتسكبها على رجلين المسيح وتمسحها بشعرها
(اللي هو تاج أي واحده ست) ..
متغاضية عن سيرتها اللي جت على كل لسان من الناس اللي قاعدين،
وعن نوع التعليقات اللي ممكن يعلقوها على اللي عملته،
علشان كان كل اللي فارق معاها هو أنها تقدم توبتها
مع محبتها بأغلى طريقة تقدر تعملها ...
والنتيجة هو ان المسيح استقبل محبتها وتوبتها وقَدرها جدا
وأكرمها في وسط الناس اللي ضايقوها بتعليقاتهم
علشان هو كان عارف قلبها ومش بس غفر خطاياها الكثيرة
لكنه قال أن قصتها دي هتفضل تتحكي جيل بعد جيل تذكارا لها.
تاكد ان ربنا بيقبل وبيقدر جدا كل توبة صادقة
ومحبة حقيقية ليه مهما كان نوع خطيتك ❤
تذكار_ساكبة_الطيب
☺️