[walaa farouk]

بعض الناس بتعتقد إن الصلاة لله
عبارة عن ترديد كلمات محفوظة فقط..
وناس تانية بتحصر الصلاة في مجرد ممارسة أو طقس،
وفي ناس غيرهم بتبقى عاوزة تصلي
لكن مش عارفة تصلي إزاي..
والحقيقة إن الصلاة..
من أكتر الأمور المهمة في علاقتنا بالله..
والله بنفسه وصانا كتير في كلمته إننا نصلي له،
وده يخلينا مهتمين جداً إننا نصلي..
والصلاة في جوهرها هي تواصل حقيقي مع الله،
ممكن يكون التواصل ده من خلال الكلام أوقات..
وأوقات تانية من خلال ممارسات..
وأوقات الإنسان يبقى مش قادر يتكلم
ولا حتى يمارس طقس معين..
الرائع في إلهنا إنه حتى لو أنا بالحالة دي قدامه،
بيبقى عنده استعداد إنه يقبلني زي ما أنا..
لو أخدنا مثال زي داود النبي والمرنم..
وده من أكتر الناس اللي قدمت صلوات لله في الكتاب المقدس
في مزمور من مزاميره قال لربنا كده..
"اجْعَلْ أَنْتَ دُمُوعِي فِي زِقِّكَ. أَمَا هِيَ فِي سِفْرِكَ؟" (مز56: 8
داود كان فاهم إن حتى دموعنا الله بيعتبرها صلاة...
وفي مرة تانية قال لربنا كده..
"تَأَوُّهَ الْوُدَعَاءِ قَدْ سَمِعْتَ يَا رَبُّ.
تُثَبِّتُ قُلُوبَهُمْ. تُمِيلُ أُذُنَكَ" (مز 10: 17)...
وده معناه إن ربنا بيسمع حتى الآه اللي بتطلع مننا
أوعى تحصر صلاتك في شكل معين..
خليك على حقيقتك قدام ربنا..
وخلي صلاتك حوار مفتوح بينك وبينه
بالطريقة المناسبة ليك..
الله بيسمع لقلوبنا قبل ما يسمع لكلامنا.