[walaa farouk]

اتنين اصحاب ماشيين في الشارع
واحد منهم وقعت منه مفاتيحه
قعدوا يدور عليها في الشارع يمين وشمال مالقوهاش
صاحبنا كان هايتجنن
صاحبه قاله ماتقلقش ان شاء الله هنلاقيها
رجعوا الطريق اللي مشيوه وبرضه مالقوهاش
المهم راحوا مشوارهم اللي كانوا رايحينه
وهم راجعين وقفهم البقال وسألهم انتوا كنتوا بتدورا الصبح على حاجه
رد واحد منهم وقال اه مفاتيح صاحبي وقعت منه
راح البقال قاله فيه واحد ابن حلال لقاها وجابهالي هنا
استني ادخل اجيبهالكم تشوفوها هي ولا لا
جابها وطلع
صاحبنا مسك المفاتيح وبص فيها
قام قايله لا مش بتاعتي
وخد صاحبه ومشي

صاحبه بقى هايتجنن وبيقوله ازاي ياجدع
دي مفاتيحك انا معلمها بالمادلية بتاعتها
قاله ايوه مفاتيحي
بس مضمنش مين لقاها ومين مسكها
طول ماهي مش معروفه بتاعت مين مالهاش لازمه
لكن لو وقعت في ايد حد غير امين وعمل نسخه عليها
ورجع عرف مين صاحبها ، وارد يأذيني او يسرقني
ف امان ليا محدش يعرف انها مفاتيحي
…….
خلاصة كلامي
مش اي حد يدخل حياتك تسلمله مفاتيحك
مش اي صاحب لسه متعرف عليه تسلمله مفاتيحك
مش اي حد يطبطب عليك ويقولك مالك تسلمله مفاتيحك
مش اي حد يبان خايف عليك تسلمله مفاتيحك

فيه ناس لما بتعرف مفاتيح اللي قدامها بتعرف تأذيها ازاي
بتعرف ازاي تدخلها منها ، وتسرق فرحتها وسعادتها
بتعرف ايه نقط الضعف وتشتغل عليها
مش كل الناس اسوياء
ومش اي حد يستاهل يعرف ايه هي مفاتيحك
شارك همك للي فعلا يخاف عليك
مش للي يقولك مالك
فضفض للي فعلا حاسس بوجعك
مش للي عنده فضول يعرفه
وماتنساش ان اغلب اللي اذونا ، كان معاهم مفاتيحنا