[walaa farouk]

لأننا اتربينا في بيوت شرقية
بتحرص على أهمية العلاقات..
اتعودنا إن إحنا نرتاح لبابا وماما
ونحكي معاهم أسرارنا ومشاكلنا،
وده مش عيب إننا نكون مرتبطين بيهم
رأيهم في أمور حياتنا..
لكن في اللحظة اللي قررت فيها إني أرتبط بزوجة،
لازم تكون زوجتي
هي مخزن أسراري الجديد ومكان راحتي..
لأننا في الزواج المسيحي أصبحنا جسد واحد ومش جسدين،
وارد إنه يحصل بينا مشاكل وخناقات
ومنبقاش متفقين في بعض الأمور..
وده عادي ولازم نتعامل معاه بحكمة وبصبر..
لكن للأسف في ناس بتدخل أهلها في مشاكل بيتها الشخصية،
وده غالباً بيبقى أمر مُضر لعلاقتنا ببعض كزوجين..
لأن الأهل بيبقى عنده آراء ممكن تكون صح أو غلط،
وكلامهم ممكن يكون مش مناسب لأي طرف فينا..
وبسبب تدخلهم ممكن المشاكل اللي بينا تكبر ومتتحلش،
علشان كده محتاجين نجتهد كزوجين
إن إحنا نحل مشاكلنا بنفسنا..
ونحتفظ بقدر الإمكان بأسرار حياتنا الزوجية..
ولو حبينا نلجأ لشخص لحل مشكلة لازم نتفق قبلها،
ولازم الشخص ده يكون متخصص في المشاكل الأسرية
ورأيه في النهاية يكون استشاري لينا مش إلزامي..
الحياة الزوجية مسؤولية مشتركة بين الزوجين..
خلونا نجتهد إننا نخليها حياة مستقرة وسعيدة سوا.