[walaa farouk]

١-قبل ما يومك يخلص ، خلص حساباتك مع الناس ..
ما تباتش لو وانت زعلان من حد و لا حد زعلان منك ..

٢-قلل عتابك علي قد ما تقدر ، و لو قدرت ما تعاتبش خالص و تفوت يبقي احسن ..

٣-وقت الزعل لا تناقش و لا تجادل .. اشرح نفسك و تصرفك مرة واحدة ،
و بعدين علي طول راضي الزعلان بكلام حلو "زعلك غالي علي" و "الا زعلك ما اقدرش عليه ..

٤-لما تلاقي شخص طبعه متعب و الكلام مش نافع بعد كل المحاولات
، ابعد بذكاء و تجنب عشرته العميقة (لو تقدر) ، و قلل احتكاكك بيه لو حبيب أو قريب ..

٥-الشخص او الحاجة اللي انت عارف انها ح تدخلك في صراع "اوصل لغاية عندها و احود !!" ..
تليفون ما تطولش او اختصر ، مكان ابعد عنه ، لمة متعبة يبقي أقل كلام بعد السلام..

٦-ما تملاش ٣ حاجات :
معدتك بالاكل لا يجيلك تخمة و امراض .

دولابك بالهدوم من غير لازمة ، غالبا ح تعلقها و تتفرج عليها .

عقلك بحوارات ما لهاش آخر ؛ ح تنتهي بخناق

٧-دور علي اي رياضة تحرك بيها جسمك حتي لو تمشية بسيطة : احسن من اي دوا .

٨-خللي عندك اي هواية تحبها تعملها : قراية، رسم ، موسيقي و غيره ..
مش كله شغل و بس..

٩-من وقت للتاني خد اجازة كام يوم .. مش لازم سفر ، المهم بلاش شغل و لا روتين ..
و في اليوم الواحد اعمل لنفسك اجازة "نص ساعة" تقعد فيها من غير اي التزامات ..

١٠-اعمل اللي وراك اول بأول، ما تاجلش و لا تسوفش:
التزم بعبادتك ، اهم علاقة بربنا تريح قلبك
بمواعيدك ،
علاقتك بعملك و بيتك و شريك حياتك و أولادك..

و ربنا يريح بالك و قلبك و ضميرك ..