[walaa farouk]

ياللى انطفت الروح جواك
ياللى عايش والايام تعباك
ياللى بقيت جوه دايره
لا خارج منها ولا سيباك ..

ياللى يومك مليان هموم
او بكتيره زى كل يوم
ياللى صوتك مكتوم مش طالع
مع انه بيصرخ بكل الحاجات ..

ياللى احساسك تاعبك بقوه
وقلبك بيقولك ايوه انا هو
وبتنكر ومكمل كأنك آله
المهم مايبنش الكسر اللى جوه ..

ياللى بتهرب من نفسك تملى
بتعود نفسك على التخلى
بقيت تستنى ومن طول الانتظار
راحت الامانى ونسيت التمنى ..

ياللى مشاعرك دابت ضيقات
ياللى عمرك فالحزن فات
بطلت تشكى واختارت السكات
ماهى اصل الشكوى بتزيد الاهات ..

ياللى ايمانك كل لحظه يقل
شويه ف ثبات وشويه تمل
ثقتك بتزيد وبتبقى كويس
وبعدها تحس ان مفيش حل ..

انا زيك بالظبط تمام
وغيرى وغيرك مليان احزان
يمكن فى كتير اصعب من حالنا
بس الكل بحاله تعبان ..

تلاقيها محدوده و مقفوله
متعقده ومهياش محلوله
كل حاجه تقولك ده اكيد
النهايه طبيعى مسدوده ..

بس فى اشد الالآمات
دايما فى اخر الاوقات
ظابط نفسه على ميعاد
إلهك إله النهايات ..

بجروحك وكل مافيك
بكل أللى معلم فيك
بكل اهات وآنات قلبك
قوله تعالى انا مستنيك ..

بيجى مع طول الليل
ماهو وقته الهزيع الاخير
مش سايبك وعينه عليك
ماهو عارف امتى يقويك ..